За качество — Гран-при

Хоць вынікі года падводзіць яшчэ і ранавата, на Пастаўскім малочным заводзе ўжо смела могуць сказаць, што фініш удалы. Выраслі аб’ёмы прадукцыі, і пашырыўся яе асартымент, а дзякуючы высокай якасці, прадпрыемства заваёўвае новыя рынкі збыту. І атрымлівае шматлікія ўзнагароды.

Па традыцыі завод удзельнічаў у рэспубліканскім грамадскім конкурсе “Лепшая прадукцыя года-2012”. Было прадстаўлена пяць узораў малочнай прадукцыі: малако пастэрызаванае “Вкусное”, кефір, абагачаны імулінам, вяршкі пітныя пастэрызаваныя, сыр пастападобны “Тызенгаўз” і сыр “Умамі”.

— Асобна хацелася б сказаць пра апошні — “Умамі”, — заўважыла галоўны тэхнолаг прадпрыемства Святлана Віктараўна Германовіч. — Слова непрывычнае, азначае “пяты смак”. Звычайна лічыцца, што чалавек можа адчуваць чатыры смакі: кіслы, горкі, салёны і салодкі. А вучоныя ў апошні час устанавілі, што ёсць пэўныя гены і рэцэптары, якія дапамагаюць адчуць і пяты смак, характэрны для кітайскай і японскай кухань. І вось нашы спецыялісты сумесна з вучонымі інстытута мяса-малочнай прамысловасці выпусцілі такі сыр — “Умамі”, які адрозніваецца своеасаблівым вострым смакам.

Журы конкурсу высока ацаніла і гэты сыр, і астатнія ўзоры прадукцыі, і ўсе яны ўзнагароджаны дыпломамі. Акрамя таго, завадчане прывезлі з конкурсу і Гран-пры за стабільна высокую якасць прадукцыі і за тое, што ў конкурсе перамаглі ўсе прадстаўленыя ўзоры.

А для нас, пакупнікоў, прыемна і тое, што напярэдадні Новага года прадпрыемства знізіла гандлёвыя надбаўкі на малако, кефір, смятану, вяршкі, малако топленае, ражанку, вяршкі, прадукт ёгуртны “Я — супер”, тварог, масла, ёгурт пітны фруктовы “Я — супер”. Гэту прадукцыю можна купіць у фірменных магазінах прадпрыемства (“Малочныя прадукты” ў 5 гарадку, “Раніца” ў 6 гарадку, “Малако” на плошчы імя Леніна, “Алёнка” побач з малочным заводам і ралет на рынку “Гарызонт).

Галіна ПІШЧ.