В Поставах установили красивую ёлку

Зіма нарэшце заявіла пра сябе снегападам і першымі маразамі. Як доўга пратрымаецца такое надвор’е? Вядома, хацелася б у бялюткім убранні наваколля сустрэць і Новы год, падрыхтоўка да якога ў гэтыя дні ў самым разгары. На цэнтральных вуліцах і плошчы Пастаў, на фасадах і вокнах прадпрыемстваў, арганізацый і ўстаноў, дамоў гараджан ужо ўстаноўлены сотні гірляндаў, мноства іншых упрыгажэнняў, якія зіхацяць, пераліваюцца рознымі колерамі і адценнямі, нагадваючы аб набліжэнні калядных і навагодніх свят.

Некалькі дзён назад пастаяннае месца на плошчы імя Леніна заняла і галоўная ёлка горада. Сёлета яна асабліва прыгожая. Адшукалі лясную прыгажуню ў Лынтупскім лясніцтве, непадалёк ад вёскі Кавалі і граніцы з Літоўскай Рэспублікай. Ад Пастаў гэта ўсяго за паўсотню кіламетраў, але “аперацыя” па дастаўцы елкі расцягнулася на паўтара дня.

— Пакрытая снегам зямля яшчэ не прамерзла, — расказваў старшы майстар участка па нарыхтоўцы мясцовых відаў паліва УП ЖКГ Якаў Адамовіч. — Таму ад лясной паляны да дарогі елку вывезлі толькі пры дапамозе двух трактароў і “Амкадора”. У дарозе асцярожнічалі. Даехалі без прыгод.

І вось раскошнае дрэва паўстала перад гараджанамі ва ўсёй сваёй прыгажосці. Паклапаціліся пра гэта многія камунгасаўцы. Але асабліва стараліся вальшчыкі Віктар Свіла і Часлаў Танана, вадзіцель МАЗа Генадзій Врублевіч, рабочы Дзмітрый Мацук. А віртуёзнасці ў рабоце машыніста аўтакрана Аляксандра Аляксандрава мог бы пазайздросціць любы іншы спецыяліст. Больш чым з 20-метровай елкай вагой каля шасці тон ён упраўляўся як з цацкай.

Потым работнікі рамонтна-будаўнічага ўчастка і электрыкі — у іх ліку Дзмітрый Валасных, Сяргей Лопанаў, Пётр Фярковіч, Аляксандр Конанаў і Мікалай Запольны — апранулі «лясную госцю» ў навагодняе ўбранне. Мінулагоднія ўпрыгажэнні дапоўнілі 12 дваццаціметровых гірляндаў-шароў дыяметрам 15 сантыметраў кожны. Атрымалася прыгожа. Жыхары і госці горада на працягу месяца будуць мець магчымасць любавацца галоўным сімвалам свята, прыходзіць сюды, каб загадаць жаданне, сустрэцца з Дзедам Марозам і Снягуркай, парадаваць дзяцей.

* * *

У Паставах навагоднія ёлкі ўстаноўлены таксама ў пятым і шостым гарадках, у мікрараёнах вуліцы Юбілейнай і АБП “Рассвет Пастаўскі”.

Тэкст і фота Пятра КУРЫЛОВІЧА.