Юные поставчане получили дипломы на литературном конкурсе

Дыпломы першай і трэцяй ступеняў атрымалі юныя пастаўчане на абласным літаратурным конкурсе, прысвечаным 130-годдзю з дня нараджэння класікаў беларускай літаратуры.

А пачалося ўсё з раённага паэтычнага конкурсу з нагоды юбілеяў слаўных песняроў беларускай зямлі Я. Купалы і Я. Коласа, арганізаванага ў кастрычніку аддзелам адукацыі. Удзел у ім прынялі 14 навучальных устаноў, якія даслалі 26 работ сваіх вучняў. З іх журы адабрала 6 лепшых, аўтарамі якіх з’яўляюцца прадстаўнікі СШ №2, №5, Гуцкай сярэдняй, Старадворскай і Курапольскай базавых школ, і адправіла на абласны конкурс пад назвай “Купала і Колас, вы нас гадавалі”. Усяго на яго паступіла некалькі соцень паэтычных і празаічных твораў аўтараў-пачаткоўцаў ва ўзросце ад 10 да 19 гадоў з розных куткоў Віцебшчыны. Апошнія былі падзелены на ўзроставыя катэгорыі: вучні 5-8 класаў (10-14 гадоў), вучні 9-11 класаў, студэнты і навучэнцы сярэдніх спецыяльных навучальных устаноў (15-19 гадоў).

Па меркаванні судзейскай камісіі, куды ўвайшлі прадстаўнікі ГА “Саюз пісьменнікаў Беларусі”, Віцебскай ЦБС і ВДУ імя П. М. Машэрава, выбраць лепшыя пробы пяра аказалася няпроста, асабліва ў малодшай узроставай групе. Тым не менш пераможцы названы. У іх лік у намінацыі “Паэзія” трапіла і вучаніца 8 класа пастаўскай СШ №2 Каця Сяменас. Яшчэ адзін вучань гэтай школы, 5-класнік Міша Пракаповіч, стаў уладальнікам трэцяга месца.

Узнагароджанне прызёраў адбылося 21 лістапада ў Віцебскай цэнтральнай гарадской бібліятэцы імя М. Горкага. Там, акрамя дыпломаў, яны атрымалі невялікія падарункі: кнігі прыдзвінскіх літаратараў з аўтографамі аўтараў, а таксама ручкі і блакноты, каб запісваць новыя творы.

Алена ШАПАВАЛАВА.