Использованные батарейки возвращайте в магазин!

прадавец Вера Гушча дэманструе пакуль яшчэ небагаты збор пальчыкавых батарэек.

 Адна пальчыкавая батарэйка, выкінутая на сметнік, забрудж­вае цяжкімі металамі каля 20 квадратных метраў зямлі. 

З вясны гэтага года ў магазіне “Культтавары” і ва ўнівермагу “Амега” раённага спажывецкага таварыства з’явіліся кантэйнеры для збору адпрацаваных батарэек. Так прадпрыемствы Белкаапсаюза адрэагавалі на актуальную праблему збору і ўтылізацыі шкодных для здароўя чалавека і навакольнага асяроддзя рэчаў.

— Прайшоў пэўны час, пакуль пакупнікі сталі звяртаць увагу на кантэйнер  з надпісам “Адпрацаваныя батарэйкі”, які ўстаноўлены пры выхадзе з магазіна, — расказвала прадавец “Культтавараў” Вера Гушча. — Спачатку толькі пыталіся, што гэта і для чаго, а потым пачалі прыносіць батарэйкі. З-за неінфармаванасці многія проста не ведаюць пра такую магчымасць, а іншыя лічаць ледзь не дзівацтвам, непатрэбнай справай.

Сапраўды, пра прызначэнне пальчыкавых батарэек ведае кожны, а вось пра тое, што іх нельга выкідваць на сметнік ці ў іншае месца — не. Выкарыстаныя батарэйкі ўтрымліваюць ртуць, свінец, кадмій, волава, нікель, цынк, магній. На звалках у выпадку гарэння ці іншага распаду цяжкія металы трапляюць у грунтовыя воды або паветра, назапашваюцца і канцэнтруюцца ў жывых арганізмах. Устаноўлена, што адна пальчыкавая батарэйка, выкінутая на сметнік, забруджвае небяспечнымі рэчывамі 20 квадратных метраў зямлі.

Па прыкладзе краін Заходняй Еўропы ў Беларусі ўсё большая колькасць насельніцтва імкнецца жыць у дружбе з прыродай. Даказваць гэта можна не толькі на яе ўлонні. Арганізаваўшы той жа збор адпрацаваных батарэек, вы акажаце рэальную дапамогу аздараўленню навакольнага асяроддзя. Важна, каб гэта справа прыжылася. Тады з цягам часу можна будзе ставіць кантэйнеры для збору выкарыстаных батарэек і ў іншых магазінах.

Тэкст і фота Пятра КУРЫЛОВІЧА.