Не обеднела голубая нива…

За ўсю гісторыю рыбгаса “Навінкі” самым ураджайным выдаўся мінулы год, калі атрымалі 1150 тон таварнай рыбы. Сёлетні “ўлоў” склаў 900 тон. Але гэта не азначае, што ў брыгады пад кіраўніцтвам майстра Вячаслава Яцэвіча было менш клопатаў. На працягу апошніх месяцаў, не зніжаючы напружання, з дня ў дзень працавалі Валерый Якімовіч, Алег Лалыка, Раман Юхновіч, Генадзій Бервячонак, Сяргей Капшуль, Раман Пачкоўскі, Уладзімір Якімовіч і іншыя члены працоўнага калектыву. Апошнія тоны рыбы былі вылаўлены ў нядзелю, у Дзень работнікаў сельскай гаспадаркі і перапрацоўчай прамысловасці, які адзначаюць і рыбгасаўцы. А напярэдадні на раённым урачыстым сходзе з выпадку свята калектыў быў адзначаны Падзякай старшыні райвыканкама.

Падчас пуціны ні на дзень не спынялася работа на сартавальнай базе. Асабліва шмат клопатаў было ў яе начальніка Андрэя Брэскага.  І цяпер адсюль штодзённа ў розныя гарады Беларусі адпраўляецца да дзесяці аўтамашын з жывымі карпам і таўсталобікам. У перыяд масавага адлову свежую рыбу можна было купіць і на месцы, у Навінках.

У гэтым годзе па вырошчванні рыбы не ўдалося выйсці на леташні ўзровень з-за таго, што вясной з-за недахопу вады засталося пуставаць больш за 100 гектараў плошчаў. У летні час не вельмі спрыяльным для росту рыбы было надвор’е.

—  Нягледзячы на гэта, прадуктыўнасць нагульных і вырасных сажалак нядрэнная, — адзначыў дырэктар прадпрыемства Аляксандр Ліхаманаў. — Напрыклад, пры плане 101 тона мы атрымалі 104 тоны пасадачнага матэрыялу малькоў сярэдняй вагой 25 грамаў кожны. Такой колькасці хопіць для таго, каб правесці зарыбленне ўсіх сажалак і ў будучым павысіць прадуктыўнасць рыбных угоддзяў.

Некаторае зніжэнне аб’ёмаў вытворчасці таварнай рыбы ў цэлым не паўплывала на фінансавае становішча, бо некалькі ўзрасла яе рэалізацыйная цана.  Прадпрыемства працуе рэнтабельна, мае прыбытак. Як падкрэсліў А. Ліхаманаў, да канца года сярэдняя месячная зарплата па рыбгасе складзе ў эквіваленце не менш за 500 долараў ЗША. А  пастаўчане не будуць у зімовы час адчуваць недахопу свежай сажалкавай рыбы.

Фота Пятра КУРЫЛОВІЧА.