«Поставский молочный завод» награждён золотым кубком на международной выставке “Peterfood-2012”

З 13 па 15 лістапада ў Санкт-Пецярбургу праходзі­ла ХХІ міжнародная харчовая выстава “Peterfood-2012”, у якой, акрамя Расіі і Беларусі, прымалі ўдзел многія еўрапейскія краіны. На выставе была прадстаўлена прадукцыя і Пастаўскага малочнага завода. Варта дадаць: прадстаўлена дастойна.

— Таму і сабралі такі вялікі ўраджай узнагарод, — адзначыла начальнік аддзела збыту і забеспячэння прадпрыемства Вольга Валянцінаўна Громава, якая на выставу выязджала разам з намеснікам дырэктара па вытворчасці Валянцінай Мікалаеўнай Лапко. — Атрымалі дыплом за плённую работу на выставе і актыўны ўдзел у садзейнічанні і прасоўванні на расійскім спажывецкім рынку якасных прадуктаў харчавання, дыплом за вернасць выставе і залаты кубак за лепшую выставачную экспазіцыю (дарэчы, ён быў уручаны толькі тром беларускім прадпрыемствам).

Акрамя таго, у рамках выставы праводзіўся конкурс якасці “Наша марка”, на які пастаўчане прывезлі сыры “Умамі”, і “Тызенгаўз”, і кожны з іх быў узнагаро­джаны залатым медалём і дыпломам. А яшчэ ўручаны падарачны сертыфікат за тое, што сыры атрымалі вышэйшую ўзнагароду ўніверсальнага партала прадуктаў харчавання “GoodsMatrix.RU», што дае права на 15-працэнтную скідку пры размяшчэнні інфармацыйна-рэкламных паслуг на сайце гэтага партала, а таксама на публікацыю навін і рэкламных артыкулаў.

Атрымаць столькі ўзнагарод, вядома ж, прыемна, і ў гэтым  заслуга ўсяго калектыву завода. Але не менш важна і тое, што спецыялісты прадпрыемства мелі магчымасць сустрэцца са сваімі пастаяннымі партнёрамі і дылерамі, цяперашнімі і патэнцыяльнымі пакупнікамі, работнікамі гандлю з Санкт-Пецярбурга, Ленінградскай, Мурманскай, Архангельскай, Пскоўскай і іншых абласцей Расіі. Усе яны зацікаўлены ў пастаўках нашай, як адзначалі, высакаякаснай, смачнай, натуральнай прадукцыі.

Галіна ПІШЧ.

Фота Уладзіміра КАЛІБАТАВА.