Поставские медики ищут пути решения проблемы

Нярэдкія ў апошні час звароты грамадзян у раённую газету звязаны з адсутнасцю ў Пастаўскай ЦРБ урачоў-гінеколагаў. Пракаменціраваць сітуацыю мы папрасілі галоўнага ўрача УАЗ “Пастаўская ЦРБ” Уладзіміра Мікалаевіча ЧАКАВАГА. Вось што ён патлумачыў:

— Сітуацыя склалася сапраўды няпростая, і звязана гэта з тым, што чатыры спецыялісты амаль у адзін і той жа час пакінулі работу ў Пастаўскай ЦРБ (адна паехала за межы Беларусі, два ўрачы пайшлі на пенсію, адна знаходзіцца ў дэкрэтным водпуску). Каб вырашыць пытанне, запрашаем акушэраў-гінеколагаў з устаноў аховы здароўя Віцебска. Згодна з загадам начальніка ўпраўлення аховы здароўя аблвыканкама, у Пастаўскай ЦРБ пастаянна знаходзіцца ў камандзіроўцы адзін з вопытных акушэраў-гінеколагаў з абласнога цэнтра, які аказвае дапамогу ў акушэр-гінекалагічным аддзяленні і вядзе прыём у жаночай кансультацыі.

Акрамя таго, з 1 жніўня на стаўку працуе ўрач Лілія Аляксандраўна Рэут, якая мае спецыялізацыю і вопыт работы па акушэрстве і гінекалогіі, а з 24 верасня — па сумяшчальніцтве ўрач-акушэр са шпіталя.

Для таго, каб медыцынская дапамога была больш дзейснай, адзін раз у два месяцы будзе прыязджаць брыгада акушэраў-гінеколагаў з абласнога цэнтра. Тры вопытныя спецыялісты, якія маюць вышэйшую катэгорыю, 12-14 верасня ўжо вялі комплекснае абследаванне пацыентаў: прынялі 254 жанчыны, зрабілі 122 ультрагукавыя даследаванні.

Адным словам, над вырашэннем праблемы працуем. Спадзяюся, што яна часовая. Так думаць дае падставу той факт, што тры ўрачы-інтэрны (акушэры-гінеколагі) праходзяць стажыроўку ў Пастаўскай ЦРБ, а з 1 жніўня наступнага года яны прыступяць да работы. (Да таго ж, у медыцынскіх ВНУ займаюцца 52 выпускнікі пастаўскіх школ, у тым ліку 25 — па накіраванні ЦРБ). У кастрычніку выйдзе на работу спецыяліст — наш работнік, які цяпер адсутнічае па прычыне хваробы. Ёсць спадзяванне, што станоўча завершацца перамовы са спецыялістам першай катэгорыі з Мінска: ён даў згоду на пераезд у Паставы пры ўмове прадастаўлення яму жылля.

На жаль, рэальнасць такая, што праблема недахопу медыцынскіх кадраў на сённяшні дзень актуальная па ўсёй Беларусі, у тым ліку і ў Мінску: ва ўсіх сталічных бальніцах ёсць вакансіі.

Галіна ПІШЧ.