Акция «ЗаРождение» прошла в Поставах

Сем’і па-сапраўднаму шчаслівыя тады, калі ў кожным пакоі дома ці кватэры звіняць дзіцячыя галасы. «Дзетак шмат — гэта цудоўна!» — канстатуем радасна. У той жа час задумваемся: клопатаў нямала з малымі, пакуль яны падрастуць. Па гэтай ці па іншай прычыне здараецца так, што на свет з’яўляюцца не ўсе, якія маглі б нарадзіцца.

Праваслаўная Царква выступае супраць абортаў, і работа ў гэтым кірунку праводзіцца пастаянна. А ў адну з пятніц напрыканцы лета пастаўскім храмам Свяціцеля Мікалая Цудатворца была арганізавана акцыя «ЗаРождение». Такія мерапрыемствы праводзяцца ва ўсіх гарадах. У Паставах — упершыню. Заступніцай руху стала ікона Божай Маці Чанстахоўскай (копія). Яе правезлі праз усю Беларусь, цяпер яна знаходзіцца ў Мінску.
Сам праект накіраваны на абарону сямейных каштоўнасцей і на тое, каб захаваць жыццё дзіцяці, каб павялічвалася колькасць мнагадзетных сем’яў і каб яны ўсе былі добранадзейныя. Падчас акцыі на храмавай тэрыторыі панавала незвычайная атмасфера таварыскасці, добразычлівасці. Вучні і выкладчыкі нядзельнай школы, прыхаджане — актывісты і валанцёры — наладзілі сапраўднае свята, удзельнікамі якога станавіліся ўсе прахожыя, каму гэта было цікава. Яны ўручалі памяткі з тэкстамі, прачытаўшы якія наўрад ці застанешся абыякавым, глухім да слоў немаўляці, якое не нарадзілася. Удумайцеся, напрыклад, у гэтыя словы: «Я такой же, как все, как бутончик в росе, я хотел расцвести и по жизни идти. Мама, мама, зачем ты меня сорвала? Мама, мама, зачем мою жизнь отняла? Я просил: «Не губи!» Я молил: «Полюби!» Только слышал в ответ: «Нет! Нет! Нет!» І калі сэрца хоць адной жанчыны, якая збіралася зрабіць аборт, здрыганулася пасля гэтых слоў і яна адмовілася ад намеру, гэта і ёсць перамога.

Падчас акцыі прапаноўваліся літаратура па тэме (а яе можна ўзяць, запісаўшыся ў царкоўную бібліятэку), дыскі. Акцыя мела і дабрачынны характар. Прымаліся добраахвотныя ахвяраванні, і атрыманыя сродкі былі накіраваны на падтрымку дзяцей, якія аказаліся без бацькоўскай апекі.

А сямнаццатай гадзіне ў храме адбыўся малебен аб здароўі цяжарных да іконы Божай Маці «У родах памочніца». Яго правёў настаяцель протаіерэй Валерый Пашкевіч.

Галіна ПІШЧ.
Фота Пятра КУРЫЛОВІЧА.