Праздник улицы Юбилейной в Поставах

Святы мікрараёнаў даўно сталі традыцыйнымі ў календары культурных падзей нашага горада. У кожнага з іх свае час і месца правядзення. Напрыклад, пяты гарадок збірае жыхароў у канцы мая на пляцоўцы каля раённага Дома культуры. Шосты гарадок святкуе ў сярэдзіне жніўня на беразе возера Задзеўскае. А вось “пара” Юбілейнай — залатая восень, другая палова верасня, калі дрэвы пачынаюць апранаць жоўта-барвовы ўбор, а на дварэ яшчэ дастаткова цёпла і сонечна. Менавіта такім — яркім не толькі ад восеньскіх фарбаў, але і ад шчырых усмешак дзясяткаў жыхароў, цёплым і сонечным — выдалася 16 верасня, калі ля сцен СШ №1 загучалі песні і віншаванні ў адрас тых, хто пражывае ў гэтым мікрараёне.

Юбілейная — адзін з самых маладых мікрараёнаў у Паставах. І, як адзначыў, вітаючы яго жыхароў, намеснік старшыні райвыканкама Ю. М. Кісялёў, ён вызначаецца асаблівай атмасферай і дынамікай у развіцці. За некалькі апошніх гадоў тут вырасла шмат новабудоўляў. Так, з 2009-га па 2012 год здадзены ў эксплуатацыю адзін 80-кватэрны і пяць 60-кватэрных дамоў, дзякуючы чаму 430 сямей атрымалі новае добраўпарадкаванае жыллё. У канцы бягучага года плануецца ўвесці ў эксплуатацыю яшчэ адзін 60-кватэрны жылы дом. А гэта значыць, што Юбілейная зноў папоўніцца новымі, пераважна маладымі, жыхарамі. Але і без таго іх колькасць за непрацяглы час павялічылася настолькі, што ў школе ўпершыню пасля 80-ых гадоў мінулага стагоддзя сёлета адкрыты ажно 5 першых класаў. У геаметрычнай прагрэсіі расце таксама колькасць дашкалят, і ўжо хутка, напэўна, спатрэбіцца будаваць у мікрараёне яшчэ адзін дзіцячы садок.

Усё гэта не можа не ўсяляць аптымізм і радасць, у першую чаргу ў сэрцы саміх жыхароў Юбілейнай, якія імкнуцца зрабіць яе яшчэ больш утульнай і прыгожай, штогод высаджваючы каля сваіх дамоў кветкі і маладыя дрэўцы. Асабліва стараюцца ўпрыгожыць прыдамавыя тэрыторыі жыхары новабудоўляў. На іх сёлета і была звернута асаблівая ўвага пры традыцыйным падвядзенні вынікаў па добраўпарадкаванні. Урэшце лепшай прызнана тэрыторыя ля дома №17. Старшай па ім Іне Мікалаеўне Драбовіч Ю. М. Кісялёў і намеснік дырэктара УП ЖКГ М. А. Кабайла ўручылі салодкі пачастунак — торт.

Старшая па доме № 17 Іна Мікалаеўна Драбовіч з дачкой.

Увогуле, кветак у мікрараёне вялікая колькасць. А найбольш іх — у двары СШ №1, які ў той дзень “расцвіў” яшчэ ярчэй і пышней дзякуючы асеннім букетам і кампазіцыям, зробленым вучнямі школы на конкурс “Залатая чараўніца восень”. Пра дружныя, зладжаныя калектывы гэтай навучальнай установы, дзіцячага сада “Крынічка”, арганізацый, прадпрыемстваў і магазінаў, размешчаных у мікрараёне і паблізу яго, на свяце было сказана шмат добрых, цёплых слоў. А маленькія выхаванцы садка, вучні школы і іншыя самадзейныя артысты, сярод якіх былі госці з Нарачы, падарылі ўсім свае вершаваныя і музычныя віншаванні. Прагучалі таксама персанальна адрасаваныя віншавальныя “паштоўкі” — самай юнай жыхарцы мікрараёна Юлі Панковай, якая з’явілася на свет 9 верасня, і яе бацькам Крысціне Іванаўне і Аляксею Мікалаевічу; самай маладой сям’і Вольгі Касюра і Андрэя Вештарта, чый стаж сумеснага жыцця складае ўсяго адзін месяц; мнагадзетнай сям’і Ірыны Эдуардаўны і Сяргея Пятровіча Сідаровічаў, што выхоўваюць чацвярых дзяцей; жамчужным юбілярам Аляксандру Карлавічу і Іне Аляксандраўне Зілгалавым, якія ўзялі шлюб тры дзесяцігоддзі назад, 2 кастрычніка 1982 года. Усе яны атрымалі яшчэ і невялікія падарункі.

Ганаровымі граматамі і грашовымі прэміямі прадпрыемстваў на свяце былі адзначаны лепшыя работнікі заводаў “Паставымэбля” і “Беліт”. Памятныя сувеніры ў гонар прафесійнага свята — Дня работнікаў лесу — атрымалі супрацоўнікі лясгаса, якія пражываюць на Юбілейнай. Не забыў пра сваіх укладчыкаў і “Белаграпрамбанк”. Начальнік разлікова-касавага цэнтра №1 аддзялення банка ў г. Паставы Д. М. Собаль уручыў ім падарункі, а яго калега, пераапрануты ў касцюм Агрыка з сімволікай банка, парадаваў дзяцей, падарыўшы ім паветраныя шарыкі. Гэты персанаж асабліва спадабаўся малышам, якія ахвотна абдымаліся і фатаграфаваліся з ім.

Праграма свята складалася не толькі з віншаванняў і пажаданняў. Арганізатары пастараліся зрабіць яе разнастайнай і цікавай для ўсіх. Побач са сцэнай, дзе праходзіла асноўная дзея, на школьным стадыёне, былі арганізаваны спаборніцтвы вучняў першай, другой і чацвёртай школ у лёгкаатлетычнай эстафеце і гульня ў футбол. Тут жа сваё майстэрства дэманстравалі юныя выхаванцы ваенна-спартыўнага клуба “Азімут” і супрацоўнікі раённага аддзела па надзвычайных сітуацыях. З другога боку школы для маленькіх наведвальнікаў свята працавала дзіцячая пляцоўка, дзе хлопчыкаў і дзяўчынак забаўлялі вясёлыя клоўны — 9-класніцы СШ №1 Надзя Маразевіч і Віка Януш, якія займаюцца ў гуртку “Акцёрскае майстэрства” ў раённым цэнтры дзяцей і моладзі. Таксама былі арганізаваны продаж і розыгрыш латарэйных білетаў. 66 штук іх разляцеліся за лічаныя хвіліны, нібы гарачыя піражкі. А прызамі шчасліўчыкам стала прадукцыя ААТ “Паставымэбля” — кніжныя паліцы, табурэты і іншае. Сваю сувенірную прадукцыю прапаноўваў пакупнікам Дом рамёстваў “Стары млын”. Працаваў гандаль.

Завяршальным акордам свята стаў невялікі канцэрт народнага ансамбля народнай музыкі і песні “Заранка” выкладчыкаў Варапаеўскай дзіцячай школы мастацтваў.

Алена ШАПАВАЛАВА.
Фота аўтара.