Бісерам расквеціла жыццё

Каб ператварыць сталовую ў аранжарэю, шмат сродкаў не патрэбна. Пераканацца ў гэтым можна, наведаўшы Лынтупскую яслі-сад-школу. Мясцовы повар Ганна Леанардаўна Руткоўская размясціла тут выставу ўласных работ — зробленых з бісеру кветак.

“Лепш адзін раз убачыць, чым сто разоў пачуць”, — узгадала прымаўку, калі перад вачыма, нібы жывыя, застракацелі дзясяткі крэатыўных раслін. І ўявіць не магла, што з дроту і драбнюткага бісеру можна стварыць такую прыгажосць.

— Маё захапленне бісерапляценнем пачалося года паўтара назад, — расказвае Ганна Леанардаўна. — Першай гэтай творчай справай занялася дачка. Цікава стала і мне. Зрабіла невялікую елачку — спадабалася. Пасля мяне ўжо было не спыніць…

Кветкі “вырасталі” як грыбы пасля дажджу — яркія, не падобныя адна на другую, паасобку і ў цэлых кампазіцыях. Сёння работ дзясяткі, і кожная з іх выклікае шчырае захапленне.

Першыя работы ў сталовай з’явіліся пасля мінулагодняга рамонту — повару захацелася ўпрыгожыць новыя стальніцы. І вучні, і настаўнікі вельмі ўпадабалі такі арыгінальны дэкор памяшкання. Яркага ў жыцці многа не бывае!

Раней ідэі Ганна Леанардаўна “пазычала” ў журналах і інтэрнэце, сёння з’яўляецца шмат уласных. Але адкуль яны ні былі б узяты, увасобіць іх у жыццё — справа вельмі карпатлівая. Бывае, не адзін тыдзень карпее, каб стварыць новы выраб.

Бісерапляценне хоць і забірае шмат часу, але дадае нямала душэўнай раўнавагі.

— Гэты занятак настолькі мяне супакойвае, што пра ўсе непрыемнасці забываю, — прызналася Ганна Леанардаўна. — І стымул працаваць з’явіўся: хутчэй робіш усе хатнія справы, каб толькі зноў узяць у рукі бісер.
Бісерапляценне — не адзінае захапленне жанчыны. Кулінарыя, хоць ужо на працягу 16 гадоў з’яўляецца працай, не перастае прыносіць задавальненне.

— Выстава абавязкова будзе папаўняцца новымі работамі, — запэўнівае Ганна Руткоўская.

І гэта нягледзячы на тое, што вялікую колькасць часу аднімаюць праца, выхаванне дзвюх дачок, клопаты па гаспадарцы…

Галоўнае — мець жаданне расквеціць жыццё.

Іна СНЯЖКОВА. Фота аўтара.