На развітанне гаварылі “дзякуй!”

На пачатку гэтага тыдня восень зноў парадавала цяплом. І адразу актывізаваліся работы ў полі. Вось і ў ААТ “Камайскі-агра” ў навучэнцаў Наваполацкага дзяржаўнага політэхнічнага каледжа нібы другое дыханне з’явілася. Усе тры атрады ў паўтара і больш разоў перавыконвалі дзённую норму выпрацоўкі, многія юнакі і дзяўчаты падбіралі за капалкай па 1000—1200 кілаграмаў бульбы. А рэкорд — 250 вёдзер за дзень — устанавіў другакурснік Андрэй Гаманёк.

Андрэй Гаманёк.

— У гэтым нічога асаблівага няма, — гаварыў хлопец. — Нарадзіўся і вырас у вёсцы Касары Ушацкага раёна, змалку працаваў разам з дарослымі. У Камаях нас сустрэлі гасцінна, ніякіх нязручнасцей не адчуваем. Таму і вырашылі папрацаваць так, каб дапамога атрымалася сапраўды адчувальнай.

Старшыня прафсаюзнага камітэта сельгаспрадпрыемства Таццяна Косарава лічыць, што сёлета на памочнікаў пашанцавала. Навучэнцы ўсіх трох атрадаў, а гэта 70 чалавек, паказалі сябе толькі са станоўчага боку. Клубні падбіраюць хутка, якасна. Знаходзяць час для жартаў, весялосці, падбадзёрвання. У атрадах самі вырашылі, што будзе весціся індывідуальны ўлік зробленага. Таму ўсе стараюцца, ды і аплата працы залежыць ад выкананага аб’ёму. Першымі “мільянерамі” па налічанай зарплаце сталі Андрэй Гаманёк, браты Аляксей і Юрый Фядзько, Юлія Косцюшава, Раман Красільнікаў, Вадзім Пірог, Ксенія Граковіч, Уладзіслаў Банцэр, Ігар Варламаў, Кірыл Купач, Раман Сомаў, Аляксандр Казлоўскі, Ілья Рымко.

Кіраўнікі атрадаў дапаўнялі гэты спіс новымі прозвішчамі і прасілі абавязкова адзначыць у газеце кіраўнікоў і спецыялістаў гаспадаркі, якія робяць усё для таго, каб не здаралася затрымак з-за тэхнікі, каб смачным і свежым было харчаванне, прыемным — адпачынак.

Маладыя новапалачане папрацавалі на ўборцы бульбы нямногім больш за два тыдні. За гэты час яны накапалі 580 тон клубняў, зарабілі 100 мільёнаў рублёў. У тым, што работа на бульбяных палетках у камайскім аддзяленні паспяхова завершана, несумненная заслуга навучэнцаў. Пастараліся і механізатары. На разорванні глебы — Юрый Гарбуноў і Станіслаў Мацук, на адвозцы бульбы — Іосіф Каравацкі, Юрый Урбановіч, Андрэй Сакалоў, Алег Курцін, Павел Пятроў і іншыя.

Будучыя спецыялісты нафтахімічнай, газавай і іншай прамысловасці паводзілі сябе дысцыплінавана, да работы адносіліся адказна. Таму, развітваючыся ўчора з памочнікамі-гараджанамі, ім гаварылі толькі “дзякуй”. Задаволенымі засталіся і самі рабяты.

Тэкст і фота Пятра КУРЫЛОВІЧА.