Уборка картофеля на полях Поставщины

Добры настрой у дзевяцікласнікаў СШ №2 г. Паставы.

Трэці тыдзень урочышча “Старыно”, што ў наваколлі вёскі Навасёлкі, нагадвае поле бітвы за ўраджай. Тут у буднія дні на ўборку бульбы выходзяць да 400 і больш навучэнцаў Наваполацкага політэхнічнага каледжа, Пастаўскага прафтэхкаледжа сельскагаспадарчай вытворчасці, старшакласнікаў гарадскіх №1 і №2, Варапаеўскай і Навасёлкаўскай сярэдніх школ. Шмат працуе і тэхнікі: на капалках — Іван Шакола, Віктар Лешчык і Мікалай Рагавец, на бульбаўборачным камбайне — Аляксандр Смолка і каля 20 механізатараў і вадзіцеляў на адвозцы клубняў.

Разам з іншымі бесперабойную работу навучэнцаў і школьнікаў забяспечваюць механізатары Мікалай Рагавец і Віктар Лешчык.

— Бульбу ў гаспадарцы сёлета вырошчвалі ў адным масіве на 80 гектарах, — расказваў начальнік навасёлкаўскага аддзялення ААТ “Навасёлкі-Лучай” Віктар Шалугін. — Побач было пасаджана яшчэ 27 гектараў для патрэб насельніцтва. Людзі таксама актыўна ўбіраюць “другі хлеб”. З кожнага гектара ў сярэднім выходзіць больш за 150 цэнтнераў. Ураджайнасць некалькі ніжэйшая за мінулагоднюю. З шасці гатункаў найбольш урадзілі “Талісман” і “Рагнеда”. Накапана ўжо больш за 1000 тон клубняў. Сёлета пашанцавала на маладых памочнікаў. Стараюцца як школьнікі, так і навучэнцы. Але асабліва адзначыў бы новапалачан — юнакоў з групы №12. Яны — будучыя тэхнікі-электрыкі і ўжо цяпер да ўсяго адносяцца з адказнасцю.

Лідар спаборніцтва —сельскагаспадарчы атрад “Маланка”.

Кіраўнік “Маланкі” (так называецца сельгасатрад №12) Зоя Фёдараўна Зуй таксама гаварыла пра выключную дысцыплінаванасць і высокую актыўнасць хлопцаў. З улікам іх узросту ўстаноўлена дзённая норма выпрацоўкі — 480 кілаграмаў на чалавека. Улік вядзецца індывідуальны. Большасць навучэнцаў за капалкай клубняў падбірае ў два разы больш. А 8 верасня былі ўстаноўлены рэкорды. Навучэнцы групы №11 Андрэй Бездэль і групы №12 Сяргей Аваднёў сабралі на працягу працоўнага дня 1785 і 1726 кілаграмаў бульбы адпаведна. З улікам таго, что гэта быў выхадны дзень, дзённы заработак кожнага перавысіў 300 тысяч рублёў.

Увогуле, што датычыць аплаты працы, то яна прадумана як для навучэнцаў, так і для школьнікаў, з’яўляецца добрым матэрыяльным стымулам. З 13 па 19 верасня ў сельгаспрадпрыемстве аб’яўлена масавая ўборка бульбы, а гэта азначае, што аплата павялічваецца на 50%. Калі не падвядзе надвор’е, то за гэты час у гаспадарцы разлічваюць цалкам завяршыць уборку “другога хлеба”. А ў пятніцу адбудуцца провады маладых памочнікаў з Наваполацка. У кіраўніцтва і спецыялістаў гаспадаркі водгукі пра іх работу і работу школьнікаў самыя найлепшыя.

Тэкст і фота Пятра КУРЫЛОВІЧА.