Споём за Поставы!

Як ужо паведамлялася ў раённай газеце, 11 верасня тэлеканал “СТБ” праводзіў у Паставах кастынг удзельнікаў новага тэлевізійнага праекта “Поющие города”. Прадэманстраваць свае вакальныя здольнасці і паспрабаваць удачу ў фінале праекта ў раённы Дом культуры, дзе праходзіла праслухоўванне, прыбылі 39 чалавек — 12 пастаўчан і 27 жыхароў раёна з аграгарадкоў Юнькі, Варапаева, Лынтупы, Навасёлкі, Камаі, Дунілавічы і Навінкі. Практычна ўсе яны ў свой час прайшлі праз вядомыя на Пастаўшчыне песенныя конкурсы “Пастаўскія зоркі” і “Вясенняя хваля”.

Майстэрства салістаў, сярод якіх было адно трыо, ацэньвалі вядомая беларуская спявачка Вікторыя Алешка, вядучая тэлеканала “СТБ” і спявачка Ірына Смольская, а таксама выкладчыца Пастаўскай дзіцячай школы мастацтваў імя А. Тызенгаўза Жанна Гучык. Нягледзячы на вельмі добразычлівыя адносіны членаў журы да ўдзельнікаў кастынгу, крытэрыі іх ацэнкі былі дастаткова жорсткія. Улічвалася ўсё: не толькі вакальныя здольнасці канкурсантаў, але і іх артыстызм, харызма, уменне трымацца на сцэне, адпаведнасць канцэртнага касцюма твору, які выконваецца, у цэлым сцэнічны вобраз.

Сярод чатырох дзясяткаў удзельнікаў кастынгу журы асабліва адзначыла чацвярых — настаўніцу тэарэтычных дысцыплін Лынтупскай дзіцячай школы мастацтваў Анжаліку Сялевіч, вучаніцу пастаўскай СШ №3, выхаванку вакальнай студыі “Юніта” Юлію Жыдкую, старшага майстра службы электрахімічнай аховы падземных газаправодаў РВУ “Паставырайгаз” Аляксандра Апанасевіча і вучаніцу Навасёлкаўскай СШ Алену Мацур, якія ў далейшым змогуць пазмагацца за права трапіць у фінал праекта. Ну, а як праходзіў адбор у Паставах, можна будзе ўбачыць у бліжэйшы час на канале “СТБ”: сталічныя тэлежурналісты здымалі ўсё, што адбывалася на сцэне і за сцэнай, на камеру. Пра дзень і час выхаду перадачы ў эфір (яны яшчэ не вядомыя) мы паведамім на старонках газеты дадаткова.

Алена ШАПАВАЛАВА.