На “Дажынкі” паедзе Міхаіл Ярашэвіч

На гэтым здымку вы бачыце Міхаіла і Валерыя Ярашэвічаў, якія працуюць механізатарамі ў ААТ “Хацілы-агра”. Сфатаграфаваў братоў у памятны для Валерыя дзень. На сёлетнім жніве яго экіпаж першым у раёне намалаціў тысячу тон зерня. З гэтай нагоды маладога камбайнера павіншавала кіраўніцтва раёна, Валерыю ўручылі галоўны прыз — тэлевізар. 

У ліку першых пажадаў брату яшчэ вышэйшых намалотаў і Міхаіл, які адвозіў зерне ад камбайнаў.
— Пастарайся як след, мо і на “Дажынкі” трапіш, — і жартам, і ўсур’ёз настаўляў малодшага (усяго на год) брата Міхаіл.

Валерый Ярашэвіч лідзіраваў у раёне на працягу ўсяго жніва і намалаціў 1282 тоны зерня. Плённа працавалі і іншыя камбайнеры. Таму ўборку зерневых, якія далі з кожнага гектара больш за 52 цэнтнеры, завяршылі намнога раней за іншыя гаспадаркі.

Што датычыць Міхаіла, то ён на аўтамашыне “САЗ-3507” перавёз 1174 тоны зерня і нечакана для ўсіх выйшаў на другое месца ў рэспубліканскім спаборніцтве сярод маладых вадзіцеляў, заваяваў пуцёўку на “Дажынкі-2012”. Міхаілу давялося сапраўды пашчыраваць, бо за рэйс ён перавозіў не больш чым адзін бункер збажыны. Снаваў з поля да сушылкі і назад як той чаўнок. У адзін дзень, калі азімыя ўбіралі непадалёку ад аграгарадка, перавёз ажно 108 тон.

Манеўраны, з невялікай грузападымальнасцю САЗ-3507 часта быў задзейнічаны на перавозцы зерня на тэрыторыі сушыльнай гаспадаркі. А гэта яшчэ дзясяткі тон, якія, на жаль, у адпаведнасці з умовамі рэспубліканскага спаборніцтва, у агульны залік не ўлічваюцца. Міхаіл не цураўся і гэтай работы, а ўвогуле можа выканаць любую: па-майстэрску косіць травы, рыхтуе глебу да сяўбы, перавозіць кармы…

Сёлетнія “Дажынкі” — не першыя ў жыцці маладога механізатара. Ён станавіўся ўжо прызёрам рэспубліканскага спаборніцтва ў 2008-ым і 2009-ым гадах, выходзіў на галоўную сцэну свят-кірмашоў у Оршы і Кобрыне.

— Тое, што мая праца зноў атрымала прызнанне, лічу заслугай усяго калектыву, — адзначыў Міхаіл Ярашэвіч. — Мне не сорамна будзе прадстаўляць раён, гаспадарку, бо на Пастаўшчыне сёлета атрыманы важкі хлебны каравай.

Тэкст і фота Пятра КУРЫЛОВІЧА.