Песні ад “Вузлянкі” і квест на веданне гісторыі. У Мядзеле адзначылі свята горада (фото)

Цэнтр Мядзела нагадваў 24 верасня адну вялікую святочную сцэну – тут адзначалася свята горада.

Край.бай анансаваў мерапрыемства.

12 пляцовак разгарнулі сваю дзейнасць у гэты дзень. Сярод іх літаратурная і дзіцячая, маладзёжная і спартыўная, арт-пляцоўка і гістарычная. А яшчэ – розныя фотавыставы і майстар-класы, прэзентацыі і акцыі. Словам, усяго і не пералічыць, паведамляе сайт газеты "Нарачанская зара".

Сярод вясёлага тлуму і забаў асаблівым момантам стаў мітынг-рэквіем “Мужнасць, гонар і любоў”, які адбыўся на брацкай магіле райцэнтра. Памяць тых, хто аддаў свае жыцці за вызваленне Айчыны, ушанавалі прадстаўнікі ад кіраўніцтва раёна і грамадскіх арганізацый.

Ад імя райвыканкама, усіх жыхароў Мядзела і гасцей свята намеснік старшыні райвыканкама Іна Барыева павіншавала сям'ю Петручэняў, у якіх не так даўно на свет з’явілася трэцяе дзіця – дачушка Ксенія, са статусам мнагадзетнай сям’і. Не абышлі і сям’ю Мароз, у якой напярэдадні свята нарадзілася дзяўчынка Мілана, і на той момант яна была самай маленькай жыхаркай горада.

На пляцоўцы “Горад малады!” падвялі вынікі конкурсу па кіданні мабільных тэлефонаў. Раман Чарняўскі і Кірыл Сенеў, у якіх вынікі аказаліся самымі лепшымі, атрымалі падарункі і апладысменты гледачоў.

Недалёка ад галоўнай святочнай пляцоўкі размясцілася фотавыстава работ мастака з Пастаўшчыны Васіля Белякова. Тэрытарыяльны цэнтр сацыяльнага абслугоўвання насельніцтва арганізаваў дзве выставы работ наведнікаў аддзяленняў дзённага знаходжання пажылых людзей і інвалідаў.

Шыкоўным аздабленнем гарадскога мерапрыемства стала ўрачыстая цырымонія рэгістрацыі шлюбу. Гучалі гукі вальса Мендэльсона…

А тым часам на пляцоўцы “У добрым родзе ўсё ў згодзе” частавалі рознымі прысмакамі. Члены фальклорна-этнаграфічнага калектыву “Вузлянка” прывезлі гараджанам сала, бліны з грыбамі і тварагом, яблыкі з вузлянскіх садоў, печыва. І ўсё гэта было шчодра прыпраўлена звонкай песняй ды вясёлымі жартамі.

Па матэрыялах сайта газеты “Нарачанская зара”