З музыкай па жыцці

Імя пастаўчанкі Карыны Браніславаўны Мейшутовіч добра вядома чытачам раёнкі. Яно не раз згадвалася на старонках газеты ў сувязі з перамогамі навучэнцаў Пастаўскай дзіцячай школы мастацтваў імя А. Тызенгаўза на разнастайных музычных конкурсах і фестывалях. Змяшчаліся таксама фотаздымкі педагога, чыё жыццё з самага пачатку непарыўна звязана з музыкай.

— Яна суправаджае мяне што­дзень з ранняга дзяцінства, бо я вырасла ў музыкальнай сям’і, — расказвала настаўніца. — Да гэтага часу клас акардэона ў нашай школе вя­дзе мама Галіна Сулейманаўна Якубоўская. Тут жа працавала акардэаністам яе родная сястра, а мне цётка Лілія Сулейманаўна Кавальчук, якая цяпер жыве ў Даўгаўпілсе. Не дзіўна, што і нас, сваіх дзяцей, яны прывялі ў музычную школу. Пасля яе заканчэння мой малодшы брат Рэнат атрымаў дыплом у Беларускай дзяржаўнай акадэміі музыкі, выкладаў у Віцебскім музычным каледжы, потым перабраўся ў Расію. Стрыечная сястра Га­ліна — выпускніца акадэміі музыкі ў Рызе, зараз працуе ў Лондане акампаніятарам у балетнай школе.

Сама Карына Браніславаўна закончыла Наваполацкае музычнае вучылішча і музычна-мастацкі факультэт Віцебскага дзяржаўнага ўніверсітэта імя П. М. Машэрава, з канца 90-ых вучыць у родным гора­дзе дзяцей ігры на фартэпіяна. У свой час яе вучаніцамі былі такія зорачкі школы, як Анжаліка Жаўнова і Вераніка Пусько (абедзве сталі прафе­сійнымі музыкантамі). Зараз падрастае яшчэ адна — Віталія Гіль. Сёлетняй вясной дзяўчынка стала ўладальніцай Гран-пры на Другім адкрытым раённым конкурсе піяністаў у Паставах, летась заняла другое месца на рэгіянальным конкурсе ў Наваполацку.

Шмат гадоў Карына Браніславаўна з’яўляецца канцэртмайстрам у сваёй калегі Галіны Эдуардаўны Барысюк. Разам з ёй і юнымі цымбалістамі ездзіць на рэспубліканскія і міжнародныя конкурсы і фестывалі, акампануючы маленькім музыкантам падчас выступленняў на сцэне, дапамагае заваёўваць дыпломы лаўрэатаў. Як некалі яе маці, педагог таксама аддала сваю дачку ў музычную школу. Сёння Эліна Мейшутовіч — студэнтка другога курса па класе фартэпіяна Віцебскага музычнага каледжа. Вучыцца там з вялікім задавальненнем. І хто ведае, магчыма, яна напіша ўласную главу ў рукапісе сямейнай дынастыі.

Алена ШАПАВАЛАВА.

Фота аўтара.