На шляху да “Універсітэтаў трэцяга ўзросту”. У Паставах адкрылася новае аддзяленне ТЦСАН.

1 кастрычніка ў Паставах адбылося адкрыццё дзявятага структурнага падраздзялення тэрытарыяльнага цэнтра сацыяльнага абслугоўвання насельніцтва — аддзялення дзённага знаходжання для пажылых грамадзян. 

У гэтым будынку па вуліцы Савецкай, 3, доўгі час размяшчаўся кабельны ўчастак. Пасля яго ліквідацыі памяшканне пуставала. Цяпер тут ёсць сапраўдны гаспадар, пра што сведчаць непазнавальны ўнутраны выгляд, сучаснае абсталяванне, тэхнічная аснашчанасць будынка і добра­ўпарадкаваная прылеглая тэрыторыя.

Наваселле атрымалася ўрачыстым, шматлюдным. На ім прысутнічалі і выступілі старшыня раённага выканаўчага камітэта В. С. Гутараў, начальнік упраўлення сацыяльнай падтрымкі насельніцтва і стацыянарных устаноў камітэта па працы, занятасці і сацыяльнай абароне абл­выканкама В. М. Астапенка, кіраўнікі прадпрыемстваў, арганізацый і гаспадарак, ветэраны працы.

Дырэктар аграрна-бадаўнічага прадпрыемства “Рассвет Пастаўскі” А. І. Малец, рабочыя якога выканалі асноўныя рамонтныя і аддзелачныя работы, уручыў загадчыцы аддзялення Л. З. Фень сімвалічны ключ ад новай установы.

Благачынны, настаяцель храма Свяціцеля Мікалая Цудатворца г. Паставы протаіерэй Валерый Пашкевіч і ксёндз-дэкан, пробашч пастаўскага касцёла Анджэй Возьняк асвяцілі будынак аддзялення і пажадалі супрацоўнікам, усім работнікам сацыяльнай службы плёну, міласэрнасці, любові да сваіх падапечных.

Раённы тэрытарыяльны цэнтр сацыяльнага абслугоў­вання насельніцтва быў створаны ў 2001 годзе. Дзякуючы падтрымцы абласнога камітэта, мясцовай улады, а ў апошні час і ініцыятыўнай рабоце кіраўніцтва самога цэнтра, ён ператварыўся ў шматгаліновую структуру, стаў адным з буйнейшых на Віцебшчыне. Менавіта ў Паставах узнікалі і апрабоўваліся новыя формы і метады абслугоў­вання пажылых людзей і іншых катэгорый насельніцтва. Калі, напрыклад, дзесьці толькі вядуцца размовы пра неабходнасць мець дзённае аддзяленне для знаходжання пажылых, то ў Паставах гэта ўжо стала рэальнасцю. У недалёкай перспектыве такое ж аддзяленне з’явіцца і ў Лынтупах. Там ужо вядзецца рамонт памяшкання.

Наваселлю па вуліцы Савецкай пасадзейнічалі абласны камітэт па працы, занятасці і сацыяльнай абароне, райвыканкам. Але асноўны аб’ём работ, кошт якіх склаў каля 2,7 мільярда рублёў, выкананы дзякуючы спонсарскай дапамозе як дзяржаўных, так і прыватных прадпрыемстваў і арганізацый. Дапамагалі ўсе, хто чым мог: грашыма, матэрыяламі, рабочымі рукамі, гатовымі вырабамі. А найбольшы ўклад унеслі прыватныя вытворчыя прадпрыемствы — Пастаўскі мэблевы цэнтр і мінскае “Илмакс”.

Нельга не адзначыць начальніка ўпраўлення па працы, занятасці і сацыяльнай абароне райвыканкама П. Л. Курто, сам тэрытарыяльны цэнтр і дырэктара Д. І. Пякарскую. Калектыў установы не толькі плённа і мэтанакіравана  абслугоўвае грама­дзян і аказвае ім сацыяльныя паслугі, але і навучыўся зарабляць грошы. Вось і для новага аддзялення было выдзелена больш за  500 мільёнаў рублёў уласных сродкаў.

Дарэчы, урачыстае адкрыццё аддзялення, святочнае знешняе і ўнутранае афармленне будынка і тэрыторыі,  культурная праграма і многае іншае  таксама было зроблена сваімі сіламі і з дапамогай тых, хто стане яго пастаяннымі наведвальнікамі.

— З выхадам на пенсію чалавек адрываецца ад працы, звыклага акружэння, актыўнай дзейнасці, — адзначыла Д. І. Пякарская. — Для большасці гэта становіцца сур’ёзным выпрабаваннем, выклікае стрэс, бо парушаюцца прывычны рытм жыцця, эмацыянальная раўнавага. У свеце існуе мноства сістэм занятасці пажылых лю­дзей. Гэтым, у прыватнасці, займаецца і  Сусветная асацыяцыя “Універсітэты трэцяга ўзросту”. Для нас яе ўзровень пакуль  недасягальны. Тым не менш у новым ад­дзяленні будзем аказваць адукацыйныя, аздараўленчыя, культурныя, а ў перспектыве і турыстычныя паслугі. Для гэтага абсталяваны трэнажорная зала, кабінет для масажу і ароматэрапіі, камп’­ютарны клас, у якіх будуць праводзіць заняткі вопытныя спецыялісты. Яны навучаць жадаючых таксама розным рамёствам і іншым цікавым заняткам.

У заключэнне Д. І. Пякарская шчыра падзякавала ўсім за дапамогу ў рамонце і абсталяванні гарадскога аддзялення і запрасіла пажылых грамадзян  стаць  яго актыўнымі наведвальнікамі.

Тэкст і фота Пятра КУРЫЛОВІЧА.