Пастараліся маладыя памочнікі

Механізатары Аляксандр Муляронак і Віктар Лешчык. Першы працаваў на адвозцы бульбы, другі разорваў барозны.

Сёлета ў адкрытым акцыянерным таварыстве “Навасёлкі-Лучай” вырошчвалі 70 гектараў бульбы. Убіраць яе пачалі 3 верасня, а закончылі — 23-га. Усяго накапана 1089 тон.  Ура­джай не вельмі парадаваў. У сярэднім з гектара атрымана па 155,6 цэнтнера.  Нягледзячы на гэта, работа ў полі спорылася. А працавалі на падборы клубняў за капалкамі ў асноўным навучэнцы прафтэхкаледжа і школьнікі.

11 і 2012 прадстаўлялі прафесіянальна-тэхнічны каледж. З 22 гектараў яны падабралі 342,9 тоны клубняў. З гэтай колькасці амаль 200 тон на рухунку рабят 210-ай  і 212-ай груп.

Сёлета нараўне з навучэнцамі папрацавалі вучні 9-ых “А” і “Б”, 10-га і 11-га класаў сярэдняй школы №2. Яны на дзень пазней прыступілі да работы і накапалі 338 тон. Старанна папрацавалі таксама старшакласнікі Навасёлкаўскай, Варапаеўскай і №4 сярэдніх школ.

У выхадныя дні, калі маладыя памочнікі адпачывалі, у полі працавалі работнікі  навасёлкаўскіх сельвыканкама і дзіцячага сада, ваеннага шпіталя, цэнтральнай раённай бальніцы, дзіцячага рэабілітацыйна-аздараўленчага цэнтра “Ветразь”, іншых арганізацый і ўстаноў. Яны заўсёды былі забяспечаны работай. Пра гэта загадзя клапаціліся механізатары Віктар Лешчык і Аляксандр Залецкі, якія працавалі з капалкамі. Пры патрэбе ў работу ўключаўся і Яніс Вішнеўскі. Для адвозкі клубняў хапала траспарту.

На цэнтральнай сядзібе гаспадаркі ёсць  бульбасхо­вішча, якім загадвае Уладзімір Паўлавіч Вежнавец. Сюды і дастаўлялі клубні з поля. Усе яны будуць прапушчаны праз сартавальны пункт. Частка бульбы гатункаў “кураж”, “рагнеда” і “архідэя” засыпаецца на насенныя мэты, харчовая затарваецца ў сеткі для рэалізацыі.

— Хочацца  падзякаваць навучэнцам і вучням, кіраўніцтву прафтэхкаледжа і школ за своечасова аказаную дапамогу, — адзначыў дырэктар сельгаспрадпрыемства Ю. Ф. Шымчык. —  Цяпер галоўнае — арганізаваць продаж бульбы, забяспечыць ёй патрэбы насельніцтва свайго раёна. З гэтай мэтай вядзём рэалізацыю клубняў у мікрараёнах горада, на адкрытым рынку па цане 2500 рублёў за кілаграм.

У навасёлкаўскім і коўзанскім аддзяленнях на плошчы 28,2 гектара была пасаджана бульба для патрэб насельніцтва. Яе ўборка таксама завершана.

Тэкст і фота Пятра КУРЫЛОВІЧА.