Рэйдавыя групы — на варце бяспекі працы

Падчас наведвання малочнага завода

У адпаведнасці з пастановай Прэзідыума Савета Федэрацыі прафсаюзаў Беларусі ад 29 лістапада 2012 года № 234 “Аб стане пытанняў аховы працы і ўмоў быту на вытворчасці”, пры Віцебскім абласным аб’яднанні прафсаюзаў створаны і працуюць рэйдавыя групы з ліку тэхнічных інспектараў працы галіновых прафсаюзаў. Штомесяц яны праводзяць маніторынг па стварэнні бяспечных умоў працы ў арганізацыях і на прадпрыемствах.

На мінулым тыдні такі маніторынг праведзены ў нашым раёне. Галоўныя тэхнічныя інспектары абласной арганізацыі Беларускага прафсаюза работнікаў аховы здароўя Святлана Кутузава, работнікаў адукацыі і навукі — Дзмітрый Лукашэвіч і работнікаў аграпрамысловага комплексу — Міхаіл Лапко наведалі аўтатранспартнае прадпрыемства №17, прыватнае прадпрыемства “Пастаўскі вытворча-мэблевы цэнтр”, СШ № 3, яслі-сад № 2, аддзел адукацыі, спорту і турызму райвыканкама, малочны завод. Асаблівая ўвага пры правядзенні маніторынгу ўдзялялася пытанням рэалізацыі арганізацыйна-тэхнічных мерапрыемстваў па ахове працы, кантролю з боку адміністрацыі і прафсаюзнага камітэта за захаваннем устаноўленага парадку перадрэйсавага медыцынскага агляду вадзіцеляў, забеспячэнню работнікаў санітарна-бытавымі памяшканнямі і іх належнаму функцыянаванню, іншым аспектам работы па ахове працы.

На малочным заводзе, дзе разам з М. С. Лапко пабывала і аўтар гэтых радкоў, найперш адбылася сустрэча з галоўным інжынерам прадпрыемства Г. П. Касценем. Георгій Пятровіч у свой час спалучаў абавязкі галоўнага інжынера з абавязкамі інжынера па тэхніцы бяспекі, таму добра ведае ўсе тонкасці справы. Менавіта дзякуючы яго намаганням, на прадпрыемстве пасады раздзялілі. Трэці год за тэхніку бяспекі на малочным заво­дзе адказвае А. Ф. Дулінец. Апошні адзначыў, што заўсёды знаходзіць паразуменне з кіраўніцтвам завода і адчувае падтрымку, сам прыкладвае нямала намаганняў для кантролю за тэхнікай бяспекі на прадпрыемстве, вялікую ўвагу надае прафілактычнай рабоце.

М. С. Лапко расказаў пра трагедыі, якія адбыліся ў вобласці за першае паўгоддзе, прычынай якіх стала грубае парушэнне элементарных правілаў тэхнікі бяспекі, засяродзіў увагу на найбольш рас­паўсю­джаных парушэннях. Затым тэхнічны інспектар пабываў на вытворчасці, азнаёміўся з умовамі працы і быту і адзначыў, што на прадпрыемстве праводзіцца адпаведная работа, якая накіравана на бяспеку працы работнікаў, даў некаторыя рэкамендацыі, аказаў метадычную дапамогу службе аховы працы.

З мэтай рэалізацыі плана работы Федэрацыі прафсаюзаў Беларусі па ажыццяўленні грамадскага кантролю на прадпрыемствах і ў арганізацыях па стварэнні наймальнікамі бяспечных умоў працы рэйдавыя групы і ў далейшым будуць праводзіць маніторынгі, у тым ліку і ў нашым раёне.

Тэкст і фота

Анны АНІШКЕВІЧ.