Наваселле ў аддзяленні Дэпартамента аховы (+фота)

8 ліпеня ў Пастаўскім аддзяленні Дэпартамента аховы МУС Рэспублікі Беларусь адбылося наваселле. Адкрыццё шматфункцыянальнага комплексу з’явілася значнай падзеяй у жыцці горада, дзяржаўнай сістэмы аховы. Ва ўрачыстай цырымоніі  прынялі ўдзел міністр унутраных спраў Рэспублікі Беларусь генерал-лейтэнант міліцыі І.  А.  Шуневіч,  начальнік Дэпартамента аховы МУС Рэспублікі Беларусь генерал-маёр міліцыі С. М. Хаменка, начальнік Віцебскага абласнога ўпраўлення Дэпартамента аховы палкоўнік міліцыі М. М. Тылец, старшыня раённага выканаўчага камітэта В. С. Гутараў, кіраўнікі сілавых і праваахоўных органаў раёна, грамадскіх арганізацый, духавенства.

Урачыстае адкрыццё новага адміністрацыйнага будынка пачалося з уручэння міністру каравая, узняцця флага і выканання Дзяржаўнага Гімна Рэспублікі Беларусь. Звяртаючыся да асабовага складу аддзялення і гасцей, генерал-лейтэнант І. А. Шуневіч сказаў:

— Сорак восем гадоў назад, 1 ліпеня 1967 года, Пастаўскае аддзяленне Дэпартамента аховы адкрыла першую старонку кнігі свайго будучага прафесійнага шляху. Пройдзе не так шмат часу — і калектыў падраздзялення  сустрэне паўвекавы юбілей ужо ў новым, сучасным будынку. У сувязі з гэтым асабліва варта падкрэсліць, што гісторыя службы —  перш за ўсё гісторыя людзей, чые паўсядзённая самааддача, мэтанакіраванасць і адданасць справе сталі галоўнымі складнікамі поспеху Дэпартамента аховы.

Гэта структурнае падраздзяленне МУС  вызначаецца высокім узроўнем аператыўнасці, мабільнасці і тэхнічнай аснашчанасці. Падраздзяленні Дэпартамента робяць усё для таго, каб кожны грамадзянін нашай краіны адчуваў сябе абароненым у любы час дня і ночы.

Ад імя кіраўніцтва і апарата Міністэрства ўнутраных спраў Рэспублікі Беларусь А. І. Шуневіч павіншаваў асабовы склад аддзялення і ўсіх прысутных з наваселлем, пажадаў здароўя, дабрабыту, поспехаў і ўдачы ва ўсіх справах і пад гукі аркестра і апладысменты прысутных уручыў нагрудныя знакі міністэрства “Выдатнік міліцыі” прапаршчыкам — міліцыянеру-вадзіцелю А. У. Бакуно­вічу і міліцыянеру У. Э. Трашчынскаму.

Затым удзельнікаў урачыстай цырымоніі вітаў начальнік Дэпартамента аховы МУС  генерал-маёр міліцыі С. М. Хаменка. Ён падкрэсліў, што ў новым адміністрацыйным будынку ахоўнікі будуць працаваць у годных, сучасных умовах. Тут з’явіцца магчымасць аптымальна арганізаваць службу, забяспечыць камфорт для асабовага складу.  Усё гэта будзе садзей­нічаць росту прафесійнага майстэрства, яшчэ вышэйшай аператыўнасці, надзейнасці ў прадастаўленні паслуг насельніцтву і суб’ектам гаспадарання, ахове маёмасці і каштоўнасцей, аб’ектаў рознага прызначэння.

С. М. Хаменка  павіншаваў з прысваеннем чарговага спецыяльнага звання “маёр міліцыі” кіраўніка раённага аддзялення Дэпартамена аховы капітана Д. А. Місюка. Нагруднымі знакамі Дэпартамента аховы МУС “За адзнаку”  ўзнагароджаны старшыня райвыканкама В. С. Гутараў  і начальнік  аддзела ўнутраных спраў райвыканкама падпалкоўнік міліцыі А. М. Гарус. Падзякі аб’яўлены ветэрану Вялікай Айчыннай вайны і органаў унутраных спраў МУС маёру міліцыі ў адстаўцы В. І. Ашчэпкаву,  міліцыянеру-кінолагу прапаршчыку С. М. Хамянку, вартаўніку У. І. Губару.  Прапаршчык А. П. Буяльскі і дзяжурны пульта кіравання В. М. Розынка ўдастоены юбілейных медалёў “70 гадоў Перамогі ў Вялікай Айчыннай вайне 1941—1945 гадоў”.

У сваім выступленні кіраўнік раённай вертыкалі Віктар Сяргеевіч Гутараў падзякаваў кіраўніцтву міністэрства і абласнога ўпраўлення ўнутраных спраў, будаўнікам, якія ўзвялі комплекс за рэкордна кароткі тэрмін — 10 месяцаў, і пажадаў асабоваму складу аддзялення плённай працы, з гонарам  несці званне супрацоўніка аховы. Лепшым з іх былі ўручаны ўзнагароды райвыканкама, а калектыву ў цэлым — падарунак.

Пастаўскім супрацоўнікам аховы наваселле запомніцца не толькі прысутнасцю высокіх гасцей, шматлікімі адзнакамі cлужбы і працы. У гэты дзень парк спецыяльных аўтамашын папоўніла “Ніва-Шэўрале”. Ключы ад новага службовага аўтамабіля былі ўручаны начальніку аддзялення Д. А. Місюку.

На цырымоніі выступілі ветэран вайны, былы начальнік аддзялення В. І. Ашчэпкаў, а таксама настаяцель Свята-Мікалаеўскага храма пратаіерэй Валерый Пашкевіч, ксёндз-дэкан, пробашч пастаўскага касцёла Анджэй Возьняк. Яны перадалі супрацоўнікам аддзялення абраз Свяціцеля Мікалая Цудатворцы, якога аднолькава шануюць вернікі праваслаўнай і каталіцкай канфесій.

Урачыстым атрымаўся момант уручэння сімвалічнага ключа. Гэту  місію выканаў заснавальнік таварыства з абмежаванай адказнасцю “Радугастрой” Андрэй Леанідавіч Тузкоў. Таварыства з’яўлялася генеральным падрадчыкам і ў сціслыя тэрміны, з высокай якасцю здало ў эксплуатацыю адміністрацыйны будынак, гаражы, вальеры, кіналагічныя палосы, добраўпарадкаваную тэрыторыю.

Права адкрыць новае памяшканне і перарэзаць чырвоную стужку было прадастаўлена міністру ўнутраных спраў генерал-лейтэнанту міліцыі І. А. Шуневічу і кіраўніку калектыву будаўнікоў А. Л. Тузкову.

— Шчыра рады і па-добраму зайздрошчу супрацоўнікам, якія будуць працаваць у новым сучасным будынку, — сказаў міністр журналістам. — Адметна, што мы маем магчымасць будаваць, ствараць. Гэта новабудоўля бу­дзе служыць не толькі міліцыянерам, але і ўсім жыхарам Пастаў. Упэўнены, што паслугі, якія аказвае Дэпартамент аховы, будуць яшчэ больш якаснымі.

Падчас цырымоніі ўрачыстага адкрыцця іграў духавы аркестр,  музычныя падарункі гасцям і гаспадарам прыпаднеслі салістка Валерыя Пронька, удзельнікі харэаграфічнага калектыву “Непаседы” раённага цэнтра дзяцей і моладзі і саліст народнага вакальнага аркестра “Вікторыя”  Першамайскага аддзела (г. Віцебск)  Дэпартамента аховы Дзмітрый Латковіч.

Завяршылася мерапрыемства асвячэннем памяшкання і аглядавай экскурсіяй.

Тэкст і фота Пятра КУРЫЛОВІЧА.