На чарговым пасяджэнні

На чарговым пасяджэнні раённага выканаўчага камітэта пад старшынствам кіраўніка раёна В. С. Гутарава, якое адбылося тыдзень таму, разгле­джаны два асноўныя пытанні: “Аб выніках ацяпляльнага сезона 2014/2015 года і падрыхтоўцы народнай гаспадаркі раёна да работы ў асенне-зімовы перыяд 2015/2016 года” і “Аб рабоце, якая праводзіцца ў раёне па захаванні зямельнага заканадаўства і ролі мясцовых органаў улады па рэалізацыі Кодэкса Рэспублікі Беларусь “Аб зямлі” і Указа Прэзідэнта Рэспублікі Беларусь ад 27 снежня  2007 года  № 667 “Аб адабранні і прадастаўленні зямельных участкаў”.

З інфармацыяй па першым пытанні выступіў намеснік старшыні райвыканкама П. Р. Станюш, які адзначыў, што мінулы ацяпляльны сезон прайшоў паспяхова, сур’ёзных праблем не ўзнікала. Але гэта не значыць, што ўсе рэзервы выкарыстаны. Павел Радзівонавіч спыніўся на пытаннях падрыхтоўкі кацельнага абсталявання, замены цепласетак, зніжэння страт цяпла, атрымання пашпартоў гатоўнасці, фінансавання работ і іншых.

У абмеркаванні пытання прыняў удзел і даў шэраг слушных рэкамендацый начальнік Віцебскага абласнога ўпраўлення па наглядзе за рацыянальным выкарыстаннем паліўна-энергетычных рэсурсаў А. Я. Краўчанка.

Пра тое, як у раёне захоўваецца зямельнае заканадаўства, далажыла начальнік землеўпарадкавальнай службы райвыканкама А. В. Іванькова. У прыватнасці, яна адзначыла, што бесперапынна ідзе працэс пераразмеркавання зямель. У перыяд з 2008  па 2014 год вернута сельгасарганізацыям 2412 гектараў сельгасугоддзяў з зямель сельсаветаў, якія аказаліся незапатрабаванымі грамадзянамі, у тым ліку сёлета прыцягнута ў сельгасабарот 128 гектараў. Для эфектыўнага выкарыстання зямель праводзіцца работа па прыцягненні зямель грамадзян у палі севазвароту, аднак не ва ўсіх сельсаветах яна дастатковая. Не выносяцца прысядзібныя ўчасткі ў палі севазвароту ў ААТ “Вярэнькі-агра”, “Хацілы-агра”, “Ярэва-агра”, “Парыж-агра”, райаграсэрвісе.

Пасля абмеркавання вынесеных на парадак дня пытанняў і агучвання задач на бліжэйшы час і перспектыву былі прыняты адпаведныя рашэнні і вызначаны асобы, адказныя за іх выкананне.

Фаіна КАСАТКІНА.