Зваротаў было няшмат

Пятнаццатага чэрвеня ў раённым выканаўчым камітэце чарговыя «прамую тэлефонную лінію» і асабісты прыём грамадзян правёў дэпутат Палаты прадстаўнікоў Нацыянальнага сходу Рэспублікі Беларусь па Шаркаўшчынскай выбарчай акрузе № 29 Мечыслаў Віктаравіч Морхат.

Тых, хто дазваніўся на «прамую лінію», цікавілі пытанні забароны на ўтрыманне свіней у асабістай падсобнай гаспадарцы і магчымасці кампенсацыі банкаўскіх укладаў. Яшчэ адзін жыхар раёна ўнёс прапанову прыцягваць да працы асоб, якія знаходзяцца ў месцах пазбаўлення волі.

Адзіны наведвальнік, які прыйшоў на асабісты прыём да дэпутата, кансультаваўся, ці можна ўзаконіць права на зямельны ўчастак, які ён заняў самавольна. Патлумачыць сітуацыю запрасілі начальніка землеўпарадкавальнай службы райвыканкама Алену Вітальеўну Іванькову:

—            Індывідуальны прадпрымальнік некалькі гадоў таму набыў з аўкцыёна зямельны ўчастак з капітальнымі будынкамі, наладзіў дрэваапрацоўчую вытворчасць. Праз некаторы час на суседнім участку пабудаваў пілараму і сушылку, складзіраваў дошкі, бярвенне, блокі. На грамадзяніна складзены адміністрацыйны пратакол аб самавольным захопе зямельнага ўчастка, матэрыялы накіраваны ў суд. Па яго рашэнні індывідуальны прадпрымальнік прыцягнуты да адміністрацыйнай адказнасці, а згодна з рашэннем райвыканкама ўстаноўлены тэрміны вызвалення ўчастка. Калі гэта не будзе зроблена добраахвотна, то работы выканаюць камунальнікі. Іншага шляху вырашэння дадзенага пытання няма. Справа ў тым, што ўчастак, які ўпадабаў жыхар райцэнтра, не прылягае да раней набытай ім зямлі (участкі раздзелены дарогай). Не парушаючы заканадаўства, аформіць праект рэканструкцыі і ўзаконіць самавольны захоп можна было б толькі ў тым выпадку, калі б участкі не былі адасобленымі.

Наведвальніку параілі звярнуцца па заключэнне інвестыцыйнага дагавора ў Віцебскі аблвыканкам.

Вераніка ФІЛАНОВІЧ.