Заваявалі залатыя і сярэбраныя медалі

Завяршыліся абласныя спаборніцтвы па футболе “Скураны мяч-2015” сярод дзяцей і падлеткаў па месцы жыхарства.

Фінальным гульням папярэднічалі спаборніцтвы, якія прай­шлі ў чатырох зонах, у тым ліку ў пастаўскай. У малодшай узроставай групе ігракоў 2003—2004 гадоў нараджэння наш раён прадстаўляла каманда ПМЦ. З аднолькавым лікам 6:0 яна выйграла ў аднагодкаў з  Ушач і Глыбокага.

Фінальныя гульні праходзілі 30—31 мая ў Новалукомлі. І тут нашы юныя футбалісты не пакінулі сапернікам ніякіх надзей. У першы дзень яны перамаглі каманды з гарадоў Ліёзна (3:2) і Чашнікі (2:1). На наступны дзень у фінале за першае месца зноў сустрэліся з ліёзнінцамі і “разграмілі” іх з лікам 6:0.

Рабяты ўзнагароджаны залатымі медалямі, а Вадзім Мацкевіч і Мікіта Давідоўскі атрымалі яшчэ і спецыяльныя прызы арганізатараў турніру як лепшыя варатар і бамбардзір. Наша каманда заваявала ганаровае права прадстаўляць Віцебскую вобласць на рэспубліканскіх фінальных спаборніцтвах “Скураны мяч-2015”, якія пройдуць у верасні ў горадзе Ліда.

У старэйшай узроставай групе на занальных спаборніцтвах у Паставах таксама перамаглі нашы футбалісты 2001—2002 гадоў нараджэння. У абласным фінале (спаборніцтвы праводзіліся 28—29 мая ў Новалукомлі) яны выйгралі адпаведна ў каманд Докшыц і Бешанковіч з лікам 2:0 і 4:3. Дзве перамогі атрымала і каманда Лепеля. Матч з ёй за першае і другое месцы завяршыўся з лікам 0:3 на карысць лепельскіх футбалістаў. Яны сталі ўладальнікамі залатых медалёў, нашы атрымалі сярэбраныя ўзнагароды. Прызы лепшых ігракоў турніру ўручаны таксама пастаўчанам, варатару Багдану Трошку і абаронцу Аляксею Хмельніку.

— Хочацца павіншаваць выхаванцаў абедзвюх каманд з годным выступленнем на абласным узроўні, заваяваннем залатых і сярэбраных медалёў, — адзначыў іх трэнер Васілій Мікітавіч Грантоўскі. — Цяпер нашы намаганні будуць скіраваны на тое, каб як мага лепш падрыхтавацца да фінальных гульняў “Скуранога мяча”.

Пётр КУРЫЛОВІЧ.