Удзельнікам і гасцям ХVІІІ Міжнароднага фестывалю народнай музыкі “Звіняць цымбалы і гармонік”

Дарагія сябры!

Сардэчна вітаю гасцей і ўдзельнікаў ХVІІІ Міжнароднага фестывалю народнай музыкі “Звіняць цымбалы і гармонік”!

Адметна, што ў Паставах праходзіць адзінае ў краіне свята народных музыкаў, і з кожным годам гэта ўнікальная з’ява мацнее, сілкуецца з глыбокіх крыніц самабытнага майстэрства. Сёлетні фестываль праходзіць у Год моладзі і па традыцыі збірае лепшыя прафесійныя і аматарскія калектывы з усіх абласцей Беларусі, розных краін свету — Літвы, Латвіі, Эстоніі, Расіі, Украіны, Малдовы, Славакіі.

Першы  рэспубліканскі  фестываль “Іграй, гармонік!” быў праведзены ў Віцебску ў 1987 го­дзе. А з 1992-га ён трывала «прапісаўся» ў Паставах і праз чатыры гады пачаў  праводзіцца  ў  рангу  міжнароднага.

Свята яднае выканаўцаў народнай музыкі, спрыяе захаванню культурнай спадчыны Паазер’я, служыць развіццю аўтэнтычнага мастацтва. Месцам правядзення фестывалю Паставы выбраны невыпадкова. Гісторыя сведчыць пра выдатную выканальніцкую школу цымбалістаў з вёскі Груздава, дзе захаваліся самабытныя дыятанічныя цымбалы.

Пашыраюцца сувязі гарадоў-пабрацімаў, іх у Пастаў ужо 12.  У рамках фестывалю адбу­дзецца падпісанне яшчэ аднаго дагавора аб пабрацімскіх сувязях — з латвійскім горадам Віесітэ. Няхай гэтыя кантакты спрыяюць сацыяльна-эканамічнаму развіццю бакоў, з’яўленню новых ідэй у культурнай прасторы, а свята папаўняе скарбонку нацыянальнага мастацтва.

Жадаю вам, дарагія сябры, здароўя, выдатнага настрою, натхнення і дабрабыту, плённай працы!

З павагай, Мікалай Шарстнёў,

старшыня Віцебскага абласнога

выканаўчага камітэта.

Паважаныя арганізатары, удзельнікі і госці фестывалю! 

Віншую вас з адкрыццём ХVIII Міжнароднага фестывалю «Звіняць цымбалы і гармонік» у горадзе Паставы!

Зноў песенная і гасцінная пастаўская зямля вітае прыхільнікаў народнай музыкі з усіх рэгіёнаў Беларусі і краін замежжа. Тут збіраюцца аматарскія калектывы і прафесіянальныя артысты — вялікія энтузіясты, апантаныя ідэяй захавання самабытных музычных і песенных традыцый свайго народа.

Фестываль унікальны, непадобны на іншыя. Ужо ў самой назве закладзены яго адметнасць і своеасаблівасць: тут гучыць народная музыка ў выкананні народных інструментаў —– цымбалаў і гармонікаў. Для калектываў гэты творчы форум — магчымасць паказаць свае дасягненні, у святочным настроі прыняць удзел у конкурсных спаборніцтвах, абмеркаваць тэндэнцыі развіцця народнай музычнай культуры, а для майстроў народнага дэкаратыўна-прыкладнога мастацтва — прадэманстраваць лепшыя ўзоры твораў народнага мастацтва і сакрэты тэхналогій стварэння вырабаў падчас правядзення майстар-класаў.

Дзякуй усім, хто ўнёс свой вялікі або маленькі ўклад у павышэнне мастацкага ўзроўню фестывалю — для фестывалю ён заўсёды будзе значным. Вялікая падзяка кіраўніцтву Пастаўскага раёна за створаныя ўмовы, гасціннасць і рэалізацыю шматлікіх цікавых творчых праектаў.

Няхай фестываль стане сапраўдным святам народнай мастацкай культуры для ўсіх яго ўдзельнікаў і гледачоў, творчым майстар-класам для музыкантаў і навукоўцаў, упрыгажэннем Пастаўшчыны, прынясе кожнаму радасць сустрэч і добры ўспамін.

Барыс Святлоў,

міністр культуры Рэспублікі Беларусь.