На забаву — “Мясцовы час”

Драматычны калектыў Варапаеўскага гарпасялковага Дома культуры “Мясцовы час” звання “народны” пакуль не мае. Але сваімі яркімі і запамінальнымі выступленнямі ён даўно заслужыў сапраўды народную любоў гледачоў.

Калектыў быў створаны ў 1995 годзе, праўда, тады меў іншую назву і іншы склад. У той час яго мастацкім кіраўніком з’яўлялася культработнік Людміла Клімашэўская. У многім дзякуючы яе прафесіяналізму, вялікай любові да сваёй справы спектаклі самадзейных артыстаў сталі папулярнымі сярод гледачоў. Пазней над пастаноўкамі працавала былая дырэктар гарпасялковага Дома культуры Аксана Міхалевіч. Пры ёй тэатралы-аматары сталі прызёрамі абласнога агляду-конкурсу “Далягляды вёскі” .

Сёння “Мясцовы час” аб’ядноў­вае 15 варапаеўцаў розных узростаў і прафесій на чале з мастацкім кіраўніком, дырэктарам Варапаеўскага Дома культуры Юліяй Галяш. Сярод удзельнікаў калектыву ёсць і навічкі, і артысты са стажам. У ліку актывістаў — маладыя чыгуначнікі Мікалай Мажэйка і Андрэй Волк, работнікі музычнай школы Вольга Танана і Ірына Козел, прадавец Алена Малатоўнік, машыніст крана завода ЖБВ Ірына Зарэцкая.

У рэпертуары драматычнага аб’яднання — сцэнкі, мініяцюры гумарыстычнага характару, парадыйныя нумары. Нядаўна тэатралы-аматары пачалі работу над пастаноўкай спектакля па матывах п’есы расійскага драматурга Алега Ернева “Загадкавы мужчына”. Яе перакладам на беларускую мову займаецца настаўнік беларускай мовы і літаратуры Варапаеўскай СШ Мікалай Алегавіч Атрахімовіч, які выдатна праяўляе сябе і на сцэне. Раней на абласным аглядзе-конкурсе самадзейных калектываў сельскай мясцовасці ён атрымаў дыплом за лепшую мужчынскую ролю.

—            Мы заўсёды ставім творы на актуальныя тэмы, сапраўды цікавыя гледачу, — расказвала Юлія Галяш. — Ці цяжка аб’яднаць людзей? Зусім не. Гэта наш адпачынак. Мы атрымліваем задавальненне не толькі ад выступленняў, але і ад рэпетыцый. Звычайна збіраемся два разы ў тыдзень, і кожная сустрэча дорыць зарад пазітыву, натхняе на паўсядзённыя клопаты. Цяпер калектыў працуе асабліва рупліва — жадае абараніцца на званне “народны”.

Варапаеўскія артысты — пастаянныя ўдзельнікі пасялковых і раённых мерапрыемстваў, народных свят; пераможцы і прызёры конкурсаў, якія праводзяцца як на Пастаўшчыне, так і за яе межамі. Журы заўсёды высока ацэньвае арыгінальнасць, выдатныя акцёрскае майстэрства, рэжысуру, сцэнарыі пастановак. Нядаўна “Мясцовы час” удзельнічаў у абласным конкурсе драматычных калектываў сельскіх устаноў культуры “Далягляды вёскі”, дзе варапаеўцы паказвалі  баладу Аляксея Дударава “Не покидай меня”. Яго вынікі стануць вядомыя ў верасні. Але, як прызнавалася Юлія Галяш, артысты выходзяць на сцэну найперш па эмоцыі.

Юлія — сапраўдны лідар калектыву. У культуры яна працуе больш за 15 гадоў. Скончыла Віцебскае вучылішча мастацтваў і Беларускі дзяржаўны інстытут культуры і мастацтваў па спецыяльнасці “Рэжысура”. Па выніках мінулага года атрымала ганаровае званне “Лепшы культработнік Віцебскай вобласці”. Сёлета прызнана Чалавекам года Пастаўшчыны. У гарпасялковым Доме культуры, акрамя драматычнага калектыву, дзейнічаюць эстрадныя і танцавальныя гурткі, аркестр народных інструментаў, аматарскае аб’яднанне “Памяць Сікоры” і іншыя, выконваецца план платных паслуг, ла­дзяцца яркія мерапрыемствы і забаўляльныя праграмы.

Іна СНЯЖКОВА.
Фота прадаставіла Юлія Галяш.