Матэрыяльная дапамога да 70-годдзя Перамогі

У Беларусі выплата матэрыяльнай дапамогі да 70-годдзя Перамогі савецкага народа ў Вялікай Айчыннай вайне пачнецца з 1 красавіка. На гэтыя мэты прадугледжана Br217,6 млрд.

Аднаразовую матэрыяльную дапамогу атрымаюць каля 46,5 тыс. чалавек. Яна будзе аказана дыферэнцыравана: у памеры Br10 млн — Героям Савецкага Саюза, кавалерам ордэнаў Славы трох ступеняў, Героям Сацыялістычнай Працы, удастоеным гэтага звання за заслугі ў гады Вялікай Айчыннай вайны; Br 8 млн — інвалідам і ўдзельнікам Вялікай Айчыннай вайны, якія прымалі ўдзел у абароне Айчыны да 3 верасня 1945 года, а таксама асобам, якія прымалі ўдзел у складзе спецыяльных фарміраванняў у размініраванні тэрыторый і аб’ектаў пасля вызвалення ад нямецкай акупацыі ў 1943-1945 гадах; Br3,5 млн — узнагароджаным ордэнамі або медалямі СССР за самаадданую працу і бездакорную вайсковую службу ў тыле ў гады ВАВ; тым, хто ўдзельнічаў у будаўніцтве абарончых збудаванняў, хто ствараў ваенныя аб’екты, абслугоўваў прыфрантавыя ўчасткі чыгунак і аўтамабільных дарог; блакаднікам Ленінграда; членам сем’яў ваеннаслужачых, партызан і падпольшчыкаў, якія загінулі або прапалі без вестак у час баявых дзеянняў у гады вайны (жонцы/мужу), якія не ўступiлі ў новы шлюб, дзецям (у тым ліку ўсыноўленым) і іншым утрыманцам, якім устаноўлена павышэнне пенсіі на ўказанай падставе ў адпаведнасці з заканадаўствам; інва­лідам з дзяцінства з прычыны ранення, кантузіі і калецтва, звязаных з баявымі дзеяннямі ў перыяд ВАВ або з іх наступствамі; былым вязням фашысцкіх канцлагераў, турмаў, гета і іншых месцаў прымусовага ўтрымання, створаных фашыстамі і іх саюзнікамі ў гады Другой сусветнай вайны, якім устаноўлена павышэнне пенсіі на дадзенай падставе.

БелТА.