Работай былі забяспечаны

Станіслаў Альфрэдавіч Рагіня ўручае Ганаровую грамату раённага выканаўчага камітэта намесніку начальніка філіяла Мікалаю Сцяпанавічу Шубельку.

У філіяле “Пастаўскае ДРБУ-132” адбыўся агульны сход працоўнага калектыву па падвядзенні вынікаў работы за 2014 год. На ім прысутнічаў і выступіў намеснік генеральнага дырэктара КУП “Віцебскаблдарбуд” Г. А. Глінскі. Ён, у прыватнасці, адзначыў, што пастаўскія дарожнікі не збаўляюць тэмпаў, па-ранейшаму з’яўляюцца ўзорам для іншых калектываў. Вось і летась па агульным аб’ёме  работ яны ўступілі толькі аршанцам, а па фінансавых паказчыках выйшлі на першае месца сярод арганізацый “Віцебскаблдарбуда”.

У мінулым годзе філіялу даво­дзіўся план выканаць работ уласнымі сіламі на 37 мільярдаў 300 мільёнаў рублёў. Заданне перавыканалі. Выйсці на такі ўзровень было няпроста, бо на ўтрыманне 975 кіламетраў абслугоўваемых дарог “Віцебскаблдарбуд” змог выдзеліць нямногім больш за 7,9 мільярда рублёў, што забяспечвала выкананне гадавой праграмы ўсяго на 25—30%. Таму для адміністрацыі і адпаведных службаў філіяла самай надзённай задачай з’яўляўся пошук такіх аб’ёмаў работ, якія б дазволілі не толькі выжыць калектыву, але і развівацца.

— Дарожнікі працавалі на розных аб’ектах не толькі ў нашым, але і ў іншых раёнах Віцебскай і Мінскай абласцей, — адзначыў начальнік філіяла  С. А. Рагіня. —  Стаўка была зроблена на выкананне ўсіх відаў работ уласнымі сіламі і сродкамі, што дало немалую эканомію грашовых сродкаў.  Атрыманая выручка — а гэта амаль 42 мільярды рублёў — дазволіла своечасова разлічвацца з падаткамі і іншымі плацяжамі, выплачваць заработную плату, утрымліваць машынна-трактарны парк і нават папаўняць яго. Па лізінгу былі набыты два 20-тонныя МАЗы, адзін ЗІЛ, два пескавозы, МТЗ-80. Усяго за год у асноўны капітал інвесціравана больш за 1 мільярд 280 мільёнаў рублёў.

Годна адзначана прафесійнае майстэрства Аляксея Бабюка, Генадзія Курто, Аляксея Кукштэля і Руслана Казакевіча.

І зараз галоўная ўвага сканцэнтравана на пошуку заказаў, заключэнні выгадных дагавораў. Вельмі важна выкарыстаць наяўныя рэзервы і магчымасці. А іх, як падкрэсліў С. А. Рагіня, шмат. Найпершую ўвагу трэба звярнуць на павышэнне прадукцыйнасці працы. Рабочы час павінен аддавацца рабоце.  Толькі пры такіх адносінах можна разлічваць на вышэйшыя канчатковыя вынікі і адпаведнае матэрыяльнае заахвочванне. Абавязкам усіх і кожнага павінна стаць эканомія гаруча-змазачных матэрыялаў і электраэнергіі. У філіяле будзе прадоўжана работа па ўкараненні на транспарце навігацыйных сістэм і датчыкаў расходавання паліва. Па-гаспадарску трэба падыходзіць да выкарыстання дарожна-будаўнічых матэрыялаў уласнай вытворчасці, запасных частак, сродкаў малой механізацыі, іншага абсталявання.

Летась  было  выраблена амаль 19 тысяч тон асфальтабетону. Але,  каб і ў далейшым мець запатрабаваны дарожны матэрыял,  да пачатку сезона на заводзе трэба правесці вялікі аб’ём рамонтных работ за ўласныя сродкі і ўласнымі сіламі.

На сходзе ішла размова і аб іншых першарговых задачах, якія трэба вырашаць у бліжэйшы час і на працягу года. Асаблівая занепакоенасць прагучала наконт таго, што пакуль недастаткова сродкаў выдзяляецца непасрэдна на ўтрыманне і абслугоўванне дарог.

У філіяле, як і ў іншых дарожных арганізацый вобласці, яшчэ нядаўна існавала праблема кадраў. У Паставах яна вырашаецца. У многім дзякуючы таму, што адміністрацыя знаходзіць сродкі для падтрымкі, заахвочвання сапраўдных прафесіяналаў, людзей, якія не лічацца з часам, выхаднымі і святамі, валодаюць сумежнымі прафесіямі. Вось і на сходзе больш за дзесяць работнікаў атрымалі Ганаровыя граматы і Па­дзякі райвыканкама, КУП “Віцебскаблдарбуд”, філіяла дарожнага рамонтна-будаўнічага ўпраўлення. Імі ўзнагароджаны Мікалай Шубелька, Міхаіл Мурзёнак, Генадзій Курто, Руслан Казакевіч, Віктар Будзіч, Наталля Волк, Аляксей Кукштэль, Мар’ян Койра, Аляксей Бабюк, Яўгеній Мазурэвіч, Рамуальд Квач, Славамір Хмылко. На Дошку гонару філіяла будуць занесены фотаздымкі 15 чалавек. Сход завяршыўся канцэртнай праграмай, якую падрыхтавалі для сваіх шэфаў удзельнікі мастацкай самадзейнасці —  настаўнікі і вучні СШ №5.

Пётр КУРЫЛОВІЧ.