Не фантастыка!

На робатызаваную ферму “Волахі” адкрытага акцыянернага таварыства “Хацілы-агра” трапіла ўпершыню. Назірала за работай робатаў і думала: яшчэ гадоў сем назад даяркі і ўявіць не маглі, што ў гаспадарцы ўзвядуць такую ферму, дзе ўсе працэсы будуць аўтаматызаваны, а робат-даяр лічыўся фантастыкай.  Цяпер гэта рэальнасць.

Карова падыходзіць да спецыяльнай устаноўкі. На ашыйніку ў жывёліны знаходзіцца датчык актыўнасці — своеасаблівы электронны пашпарт. Па чыпе робат вызначае, калі была апошняя дойка. Калі прайшло менш за пяць-шэсць гадзін — дзверы ва ўстаноўку не адчыніць, а калі малака дастаткова — рагуля апынецца ў клетцы. Прываблівае жывёліну камбікорм, які робат вы­дзяляе ў адпаведнасці з надоем. Пакуль карова ласуецца, робат мые і масажыруе вымя, з дапамогай лазернага променя адзявае на саскі даільныя стаканы і падключае апарат. Дойка доўжыцца 7-10 хвілін. Робат кантралюе якасць малака: пры неадпаведных параметрах закрывае яму доступ у агульны аб’ём і па асобным шлангу адпраўляе ў іншую ёмкасць. (Напрыклад, калі ў каровы мастыт або ёй па іншай прычыне ўводзяць антыбіётыкі.) Малодзіва (пяць дзён пасля ацёлу) таксама зліваецца ў спецыяльныя вёдры. Затым яно ідзе на выпайку цялятам. Для гэтага загружаецца ў грузатаксі, там стэрылізуецца і з дапамогай кнопкі раздаецца жывёле. Малако класа “экстра” па малакаправодзе паступае ў спецыяльнае памяшканне, дзе ўстаноўлены дзесяцітонныя цыстэрны. Перш чым трапіць у іх, ахалоджваецца. Пасля дойкі саскі каровы аўтаматычна апрацоўваюцца ёдам, а апарат дэзінфіцыруецца парай. Наступае чарга іншай жывёліны.

— На ферме ўтрымліваецца 870 кароў, — расказваў начальнік комплексу Аляксандр Станіслававіч Адамковіч. — Даенне ажыццяўляецца кругласутачна. Аператары і жывёлаводы працуюць па 12 гадзін пазменна. У адну змену выходзяць па двое. На камп’ютары можна прасачыць за кожнай каровай асобна. Тут ёсць даныя вагі жывёліны, колькі дала малака падчас кожнай дойкі, за дзень, колькі з’ела камбікорму, калі прыходзіць у ахвоту. Ветурачу, урачу-гінеколагу (ён жа асемянатар) пра стан здароўя каровы таксама «раскажа» камп’ютар. Ён выдае ўсе адхі­ленні. Устаноўлены камп’ютар і ў маім кабінеце. Праз адпаведную праграму, не падымаючыся з крэсла, магу прасачыць за кожнай жывёлінай і атрымаць неабходную інфармацыю.

За мінулы год сярэдні надой ад кожнай каровы на ферме “Волахі” склаў амаль 8 тысяч кілаграмаў малака. Сярэдні надой у гэтыя дні — каля 25 кілаграмаў. Карова-рэкардсменка дае амаль 50. За працэсам дойкі сочаць аператары Марына Міхновіч, Іна Хацяновіч, Валянціна Таяновіч, Святлана Браздаўскас, Святлана Мелец і Вольга Скачко. Яны хутка асвоілі новыя тэхналогіі і цяпер удала спраўляюцца са сваімі абавязкамі.

Анна АНІШКЕВІЧ.

Фота Пятра КУРЫЛОВІЧА.