Напішыце пісьмо

«Белпошта» запрашае да ўдзелу ў ХІХ Беларускім маладзёжным конкурсе сачыненняў эпісталярнага жанру, які праводзіцца ў рамках 44-га Міжнароднага конкурсу, арганізаванага Сусветным паштовым саюзам.

Яго мэты і задачы — даць магчымасць моладзі выказаць свае думкі, расказаць пра надзеі, якія яна ўскладвае на свет, у якім мы жывём, і раскрыць сваё бачанне адказаў на выклікі, з якімі сутыкаецца планета. Тэма конкурсу — “Напиши письмо и расскажи о мире, в котором тебе хотелось бы вырасти».

У конкурсе могуць прыняць удзел хлопчыкі і дзяўчынкі ва ўзросце да 15 гадоў. Сачыненні павінны ўяўляць сабой работы, напісаныя спецыяльна на конкурс і нідзе раней не апублікаваныя. Можна пісаць на рускай ці беларускай мовах у форме пісьма з абавязковай наяўнасцю ў тэксце наступных атрыбутаў: месца і даты, адрасоў адправіцеля і атрымальніка, прывітання, развітання, подпісу. У сачыненнях павінна строга выконвацца зададзеная тэма. Аб’ём — да 800 слоў. Работы, якія не будуць адпавядаць гэтым патрабаванням, рэспубліканскай камісіяй не разглядаюцца.

Першы этап конкурсу праводзіцца раённым вузлом паштовай сувязі сярод вучняў агульнаадукацыйных школ раёна ў перыяд з 1 лютага па 1 сакавіка. Лепшая работа будзе адпраўлена да ўдзелу ў другім этапе, які праводзіць абласны філіял РУП “Белпошта” ў перыяд з 1 па 15 сакавіка. Пераможцы першага і другога этапаў заахвочваюцца Ганаровымі граматамі РУП “Белпошта”. Лепшае сачыненне прыме ўдзел у трэцім этапе, які праводзіць РУП “Белпошта”. На ім камісія разгледзіць сем работ і прысудзіць адно першае, два другія і чатыры трэція месцы. Сачыненне, якое стане лепшым, будзе адпраўлена ў штаб-кватэру Міжнароднага бюро Сусветнага паштовага саюза.

Пішыце, а настаўнікі перададуць работы нам. Мы разам з прадстаўнікамі аддзела адукацыі, спорту і турызму райвыканкама вызначым лепшую работу і адправім яе на другі этап конкурсу. І, можа, менавіта вас чакае вялікая перамога.

М. ТАТАРЧУК, намеснік начальніка

 раённага вузла паштовай сувязі.