Марафон вучнёўскай творчасці

Пераможцы спаборніцтваў — каманда СШ № 1

31 студзеня актавая зала СШ № 1 была запоўнена да адказу — тут праходзіў раённы конкурс на лепшую пярвічную арганізацыю ГА “Беларускі рэспубліканскі саюз моладзі” сярод школьнікаў. Сёлета ён сабраў рэкордную за апошнія гады колькасць каманд — 10. У конкурсах паспаборнічалі вучні 8-11 класаў з усіх гарадскіх школ, раённай гімназіі, Гуцкай, Дунілавіцкай, Камайскай, Навасёлкаўскай СШ.

“Школьны марафон” — а менавіта так называлася мерапрыемства — прысвячаўся Году моладзі. Яго арганізатарамі выступілі аддзел адукацыі, спорту і турызму райвыканкама і райкам БРСМ.

Журы пад старшынствам першага сакратара райкама Беларускага рэспубліканскага саюза моладзі Іны Каралёвай першыя адзнакі выставіла яшчэ да пачатку выступленняў. Пасля прыезду кожная з каманд-удзельніц прадставіла аргкамітэту насценныя газеты. Згодна з палажэннем конкурсу, яны павінны былі адлюстроўваюць новае бачанне мала­дзёжнай суполкі ў папулярнай сацыяльнай сетцы “Вконтакте”. “Суддзі” ацэньвалі­ адпаведнасць зададзенай тэме, змястоўнасць і тэматычную разнастайнасць прадстаўленых работ, арыгінальнасць, якасць афармлення, навізну ідэі. У выніку найвышэйшыя балы (20 з 20 магчымых) атрымалі каманды СШ № 1 і № 4.

Непасрэдна спаборніцтвы распачаліся конкурсам-прывітаннем “Знаёмцеся, гэта мы!”. У ім школьнікі ў песнях, танцах, вершах, сцэнках і слайдшоу расказвалі пра дзейнасць сваіх пярвічных арганізацый, іх гісторыю і традыцыі, пераемнасць і сувязь пакаленняў. Юныя актывісты БРСМ прадэманстравалі максімум знаходлівасці і акцёрскіх здольнасцей, за што атрымалі ад журы вялікую колькасць “пяцёрак”. Максімальныя адзнакі выстаўлены школьнікам з Камай, Гуты, СШ № 1 і № 4.

Наступнымі паспаборнічалі капітаны каманд — сакратары пярвічных арганізацый. Яны па чарзе зачытвалі кароткія жарты на тэму школьнага жыцця. Пасля кожнага “круга” журы выбірала, хто з юнакоў і дзяўчат пажартаваў найменш удала, і той пакідаў сцэну. Конкурс працягваўся, пакуль ля мікрафона не засталася пераможца — вучаніца СШ № 4 Вікторыя Януш.

Падчас “Школьнага марафона”, які доўжыўся амаль чатыры гадзіны, прайшоў і конкурс агітацыйных брыгад. Каманды-ўдзельніцы паказалі кароткія тэматычныя нумары, мэтай якіх было расказаць пра плюсы ўступлення ў Беларускі рэспубліканскі саюз моладзі. Найлепш гэта зрабілі вучні з Навасёлак, Гуты, СШ № 1 і № 4.

Завяршыліся творчыя спаборніцтвы “Хатнім заданнем”. Кожная каманда прадставіла на суд журы і гледачоў відэаролікі гумарыстычнага характару, якія адлюстроўвалі адзін дзень з жыцця пярвічнай арганізацыі ГА “БРСМ” і былі накіраваны на папулярызацыю дзейнасці гэтай грамадскай арганізацыі. Найбольш змястоўныя і арыгінальныя ролікі, на думку журы, атрымаліся ў гімназістаў і вучняў СШ № 1.

Найвышэйшую суму балаў па выніках усіх іспытаў атрымала каманда актывістаў БРСМ з СШ № 1 (на здымку), другое месца заняла дружына СШ № 4, трэцяе — Гуцкай СШ.

Каманда СШ № 4

Каманда Гуцкай СШ

— Усім дзякуй за ўдзел і вялікую падрыхтоўку, якая была праведзена напярэдадні, — рэзюмавала першы сакратар райкама Іна Каралёва. — Асабліва радуе, што адгукнуліся і прыехалі сельскія школы. Падкрэслю, што абсалютна ўсе каманды выступілі на высокім узроўні, і кожны можа лічыць сябе пераможцам. Вельмі прыемна было назіраць за вашымі выступленнямі, якія адкрылі вас з новага боку, дапамаглі праявіць творчыя і лідарскія здольнасці.

Прызёры спаборніцтва ўзнагароджаны дыпломамі і тартамі, пераможцы — яшчэ і сувенірамі з атрыбутыкай Беларускага рэспубліканскага саюза моладзі.

Міжрэгіянальны этап “Школьнага марафона” пройдзе ў сакавіку ў Шаркаўшчыне.

Іна СНЯЖКОВА.

Фота аўтара.