Прыпынак ці курылка?

Нядаўна стала сведкай такой карціны: на аўтобусным прыпынку ў цэнтры горада сядзелі дзве жанчыны, побач стаяла мама з дзяўчынкай гадоў пяці. Да іх далучыўся малады мужчына і, не паспеўшы сесці на лаўку, адразу закурыў. Жанчыны абурана ўсталі і адышлі ўбок. Практычна да прыбыцця аўтобуса яны не маглі супакоіцца і бурна выказвалі даўно накіпелае з нагоды курэння ў грамадскіх месцах. Ці трэба казаць, што замест таго, каб хоць як-небудзь адрэагаваць, мужчына спакойна дакурыў цыгарэту?

Такія выпадкі адбываюцца паўсюль. Напрыклад, прыпынак каля інтэрната сельскагаспадарчага каледжа даўно ператварыўся ў курылку. Чакаючы транспарт, там часам можна пасіўна пакурыць адразу з трыма кампаніямі, якія, як быццам змовіўшыся, змяняюць адна другую. Дзякуй яшчэ за тое, што навучэнцы, як правіла, выкідваюць недакуркі ў сметніцу. А калі па нейкай прычыне зрабіць гэта «забываюць», нават не хочацца набліжацца да прыпынку, каб паглядзець расклад руху гарадскога транспарту: вакол адны «бычкі» і пляўкі.

У апошнія гады на дзяржаўным узроўні вялікая ўвага надаецца здароваму ладу жыцця. Адным з крокаў у гэтым кірунку з’яўляецца забарона на курэнне ў грамадскіх месцах. У адпаведнасці з заканадаўствам, курэнне ва ўстановах медыцыны, культуры, адукацыі, на прыпынках грамадскага транспарту, вакзалах і іншых месцах масавага знаходжання лю­дзей забаронена і караецца штрафам. Курыць у грамадскіх месцах — значыць парушаць закон. Але па-ранейшаму чалавек на прыпынку з цыгарэтай, якая дыміцца, хутчэй правіла, а не выключэнне.

Мяркуючы па ўсім, перамагчы гэту праблему аднымі толькі папярэ­джаннямі і абуранымі выказваннямі тых, хто не курыць, немагчыма. Нашы людзі не турбуюцца пра сваё зда­роўе, парадак на вуліцы, камфорт навакольных. Гэта азначае толькі адно — пара пераходзіць да іншых, больш дзейсных, мер барацьбы. Было б вельмі добра, калі б праваахоўныя органы сістэматычна прыцягвалі парушальнікаў да адказнасці з дапамогай штрафных санкцый. Магчыма, пакаранне рублём акажацца дзейсным спосабам у барацьбе з курэннем у грамадскіх месцах.

В. ФЁДАРАВА, г. Паставы.