Падарунак на развітанне. “Паставы-ПМЦ” — “Ветразь” (Докшыцы) — 3:2

У гэтай сустрэчы абедзве каманды згулялі ў адкрыты атакуючы футбол, і да апошніх мінут было невядома, як яна завершыцца. Пастаўчане хацелі зрабіць падарунак у выглядзе перамогі свайму 39-гадоваму капітану Андрэю Шурко, які амаль два дзесяцігоддзі быў сапраўдным лідарам калектыву, а ў той дзень праводзіў свой апошні матч і развітваўся з футболам. У перапынку адбылася ўрачыстая цырымонія провадаў ветэрана. Генеральны дырэктар ДА “Фізічная культура, спорт і турызм Пастаўскага раёна” М. С. Рамейка   пад шквал апладысментаў балельшчыкаў уручыў яму Ганаровую грамату, прэмію і футбольны мяч з аўтографамі ігракоў і трэнераў.

Перад паядынкам планавалася, што Андрэй згуляе толькі яго частку і бу­дзе заменены. Аднак матч праходзіў настолькі напружана, што прыйшлося дагуляць да фінальнага свістка і нават адзначыцца праведзеным мячом у вароты саперніка. У пачатку гэтай сустрэчы госці першымі ледзь не вызначыліся, але трапілі ў перакла­дзіну. У адказ пастаўчане ўзмацнілі свой націск, і нападаючы Раман Мядзве­дзеў з выдатнай перадачы Максіма Голубева лік адкрыў. Яшчэ чатыры разы гаспадары маглі павялічыць сваю перавагу, але заключным ударам вопытных Яўгена Чарнухіна, Уладзіміра Карагі не хапіла дакладнасці.

У выніку напрыканцы першага тайма ад нагі аднаго з пастаўскіх абаронцаў крыўдны мяч уляцеў у сетку іх варот. Пасля адпачынку госці праводзілі вельмі небяспечныя контратакі, і адну з іх завяршыў іх капітан і лепшы бамбардзір (12 мячоў) Аляксандр Палачанін — 1:2.

На шчасце, пастаўчане здолелі выправіць ход барацьбы, калі сапернік недазволеным прыёмам спыніў праход форварда Паўла Ясінскага, які выйшаў на замену. Прызначаны пенальці бездакорна рэалізаваў Андрэй Шурко, і лік зраўняўся. Пераможную кропку паставіў малады нападаючы П. Ясінскі пасля фланговага праходу і майстэрскага ўдару.

У гасцей быў шанц зарабіць нічыю, але хуткасны Юрый Сяржант прамахнуўся. Валявую перамогу пастаўчанам падаравалі Чашун, Камісарчук, Архіпаў, Шурко (к), Танана, Я. Грантоўскі, Чарнухін, Карага, Голубеў (Каралёнак), Па­вініч, Мядзведзеў (Ясінскі). У другім матчы тура “Дзвіна-Барс” (Верхня­дзвінск) дома з лікам 5:0 разграміла каманду Шаркаўшчыны. Аднак перад заключным турам у 2-ой лізе шаркаўчане датэрмінова ўслед за намі занялі 2-ое месца і пазмагаюцца ў пераходных матчах за пераход у 1-ую лігу.

Уладзімір ШЫК.

Фота Валерыя АЛЯКСАНДРАВА.