А звыш нормы газ — па сабекошце

“На днях заказала балон з газам. Мяне папярэдзілі, што нібыта выбрала сваю гадавую норму, таму заплаціць за яго давядзецца ў два разы даражэй. Хіба гэта справядліва?”

Са званка ў рэдакцыю.

Па тлумачэнні мы звярнуліся да дырэктара раённага вытворчага ўпраўлення М. Д. Жданковіча. Мікалай Дзмітрыевіч паведаміў наступнае: “Савет Міністраў Рэспублікі Беларусь 27 жніўня 2014 года прыняў пастанову № 834 “Аб індэксацыі субсідзіруемых дзяржавай цэн на газ прыродны і звадкаваны, тарыфаў на электрычную энергію і цеплавую энергію для патрэб ацяплення і гарачага водазабеспячэння для насельніцтва і ўнясенні змяненняў у пастанову Савета Міністраў Рэспублікі Беларусь ад 30 снежня 2013 года № 1166”, якая ўступіла ў сілу з 1 верасаня 2014 года.

Гэтай пастановай вызначана, што норма спажывання звадкаванага газу ў балонах ёмістасцю 50 літраў (вагой 21 кілаграм) на аднаго чалавека ў год складае 5 балонаў (105 кілаграмаў) і кошт аднаго балона складае 85 тысяч рублёў. Калі ж спажывец не ўкладзецца ў норму і будзе набываць газ звыш яе, то балон будзе каштаваць па сабекошце — 158 тысяч 650 рублёў (колькасць балонаў па такой цане не абмежавана).

І яшчэ пра адзін аспект. Колькасць людзей, якія пражываюць у доме, пацвярджаецца рэгістрацыяй (даведкай пра склад сям’і). А вось калі вы карыстаецеся звадкаваным газам на дачы ці па іншым адрасе, а там ніхто не зарэгістраваны, то водпуск балонаў будзе праводзіцца толькі па сабекошце”.

Несумненна, розніца ў цане вялікая. Але, як сцвяр­джае М. Д. Жданковіч, абсалютная колькасць карыстальнікаў звадкаванага газу ўкладваецца ў норму. Да таго ж, усім нам трэба вучыццца эканоміць.

Фаіна КАСАТКІНА.