П’едэсталам гонару стала “Гінеўская гара”

старшыня раённага выканаўчага камітэта Віктар Сяргеевіч Гутараў віншуе Аляксандра Курдо і Алега Даўгеля з намалотам тысячы тон зерня.

11 жніўня першым на Пастаўшчыне 1000 тон збожжа намалаціў экіпаж камбайна “Джон Дзір” адкрытага акцыянернага таварыства “Навасёлкі-Лучай” у складзе Аляксандра КУРДО і Алега ДАЎГЕЛЯ.

Так склалася, што на сёлетнім  жніве адзінымі прэтэндэнтамі па намалоце першай тысячы тон зерня ў раёне сталі камбайнеры менавіта гэтага сельгаспрадпрыемства. Да апошняга дня амаль упоравень ішлі Сяргей Гіль, Віктар Дулінец, Станіслаў Марці­новіч, Сяргей Каралёнак, Уладзімір Праліч. І толькі ў мінулую нядзелю наперад выйшаў экіпаж у складзе старшага камбайнера Аляксандра Курдо і яго памочніка, навучэнца Гарадоцкага тэхнічнага каледжа Алега Даўгеля, а на наступны дзень яны сталі тысячнікамі. Адбылося гэта ў лучайскім аддзяленні, ва ўрочышчы “Гінеўская гара”. Тут, як ніколі раней, ура­дзіла азімая пшаніца. І хаця рэльеф 70-гектарнага поля месцамі складаны, работа спорылася. Апошні бункер зерня ў лік тысячнага намалоту прыняў МАЗ ветэрана-вадзіцеля, таксама тысячніка Леанарда Бугая.

На зыходзе дня ў полі сабраліся госці і гаспадары. З працоўным дасягненнем экіпаж павіншаваў старшыня раённага выканаўчага камітэта Віктар Гутараў. Ён уручыў Аляксандру Курдо Падзяку і галоўны прыз сёлетняга жніва  — тэлевізар, а Алегу Даўгелю — пыласос. Перадавікі жніва атрымалі таксама грашовыя ўзнагароджанні і памятны сувенір, якія ўручылі старшыня раённай арганізацыі прафсаюза работнікаў АПК Сяргей Герасіменка, начальнік лучайскага сельгасаддзялення Часлаў Бурак, старшыня прафкамітэта гаспадаркі Славамір Шапель.

Механізатар Аляксандр Курдо ўпершыню сеў за штурвал камбайна трынаццаць гадоў назад, а ў 2005-ым  дзякуючы тагачаснаму кіраўніку калгаса А. А. Валодзьку атрымаў замежны “Джон Дзір”. Уборачная машына была не новая, але яе тэх­нічныя характарыстыкі і магчымасці ўражвалі. Таму невыпадкова камбайнер штогод намалочвае больш за тысячу тон зерня, а ў адзін з сезонаў выйшаў нават на 2000-ы намалот.

— Канешне, прыемна атрымліваць віншаванні, падарункі, — адзначыў Аляксандр Курдо. — Але я ніколі не гнаўся ні за гектарамі, ні за тонамі. Сёлета таксама працаваў як звычайна. Не падводзіў камбайн, менш было прастояў, вось і атрымаўся такі намалот.

На мінулагоднім жніве ў гаспадарцы было шмат палеглай збажыны. Убіралі яе ў асноўным на “Джон Дзіры” і “Мезе” камбайнеры Аляксандр Курдо і Сяргей Каралёнак. Выпрацоўка была невысокай, але не скардзіліся. Сёлета яны таксама працуюць пераважна разам. Кіраўнік аддзялення Часлаў Бурак і аграном Славамір Ландышка іх работай, як і работай вадзіцеляў, вельмі задаволены.

Каменціруючы ход уборкі зерневых і зернебабовых, старшыня райвыканкама В. С. Гутараў адзначыў, што жніво ў раёне выходзіць на фінішную прамую, фактычна выкананы дзяржаўны заказ па продажы харчовага збожжа. Сёлета ёсць магчымасць намалаціць каля 60 тысяч тон зерня пры сярэдняй ураджайнасці 26 цэнтнераў з гектара. Арыенцірам жа ў рабоце па-ранейшаму з’яўляюцца дасягненні ААТ “Навасёлкі-Лучай” і “Хацілы-агра”.

Тэкст і фота Пятра КУРЫЛОВІЧА.