Ёсць першы тысячнік!

С. М. Герасіменка віншуе А. А. Альхімёнка з перавезенай першай тысячай тон зерня.

Ім стаў вадзіцель адкрытага акцыянернага таварыства “Навасёлкі-Лучай” Аляксандр Альхімёнак.

У панядзелак зранку частка камбайнаў працавала на ўборцы ячменю ля вёскі Мацуры. Тут і сустрэліся з Аляксандрам Аляксандравічам Альхімёнкам, які напярэдадні, у нядзелю, першым на Пастаўшчыне перавёз з поля на ток 1000 тон збожжа. З выдатным дасягненнем вадзіцеля павіншавалі і ўручылі яму грашовыя прэміі і памятны сувенір дырэктар сельгаспрадпрыемства Ю. Ф. Шымчык, старшыня раённай арганізацыі прафсаюза работнікаў АПК С. М. Герасіменка, старшыня прафкамітэта С. Г. Шапель. А перад гэтым тысячнік надзеў абноўкі — футболку і кепку з лагатыпам Беларускага прафсаюза работнікаў аграпрамысловага комплексу. І пакуль збіраліся віншаваць, паспеў загрузіць прычэп свайго МАЗа спелай збажыной.

Тое, што Аляксандр Альхімёнак на сёлетнім жніве стаў першым тысячнікам, не з’явілася нечаканасцю. Летась ён таксама быў у перадавіках, за сезон перавёз 2045 тон збожжа — больш за ўсіх у раёне.

— Стараюся ў полі нікому не замінаць, — расказваў Аляксандр Аляксандравіч. — Пакуль і аўтамашына не падводзіць, хаця МАЗу ўжо дзясяты год. Як ніколі стаіць пагодлівае над­вор’е, радуе ўраджай, таму і працуецца добра.

Вадзіцель ні слова не сказаў пра цяжкасці, пра тое, як даймае спёка і як няпроста цэлы дзень курсіраваць па маршруце “по­ле—зернесушыльны комплекс”. Дамоў гэтым часам вяртаецца не раней за 23 гадзіны, бо, прывёзшы вечарам збажыну ад камбайнаў, дапамагае ўпраўляцца на сушыльнай гаспадарцы. А раніцай, пакуль яшчэ ўборачныя машыны не ў полі, разам з іншымі адвозіў зерне на хлеба­прыём­нае прадпрыемства.

У гаспадарцы заўважылі, што калі хтосьці працуе разам з Альхімёнкам, то расслабляцца ён не дазволіць. Так было вясной і ў пачатку лета, калі падвозіў у поле мінеральныя ўгнаенні. Уносіў іх механізатар Яніс Вішнеўскі. Аляксандр Аляксандравіч паспяваў рабіць тры-чатыры рэйсы, у той час як іншыя — удвая менш. Без “перакураў” працавалі ўвесь час. У выніку Вішнеўскі выйшаў на першае месца ў раёне.

Удзячны яму і камбайнеры, бо ведаюць, што Альхімёнак не затрымаецца дарэмна ў дарозе. Увогуле, вадзіцелі ў сельгаспрадпрыемстве як на падбор. Сёння-заўтра павінны стаць тысячнікамі Валянцін Ромаш, Леанард Бугай. На падыходзе і камбайнеры Станіслаў Марціновіч, Аляксандр Курдо, Сяргей Каралёнак, Віктар Дулінец, якія таксама спаборнічаюць за тысячныя намалоты.

Тэкст і фота Пятра КУРЫЛОВІЧА.