Умовы ёсць, патрэбна жаданне

Штогод у апошнюю нядзелю чэрвеня ў Беларусі адзначаецца Дзень моладзі. На Пастаўшчыне крыху больш за 7 тысяч жыхароў ва ўзросце ад 14 да 31 года. Якія ўмовы створаны ў нашым раёне для іх вучобы, прафесійнай дзейнасці, адпачынку? Як праяўляе сябе маладое пакаленне? На гэтыя і іншыя пытанні карэспандэнту “Пастаўскага краю” Іне СНЯЖКОВАЙ адказвае намеснік старшыні райвыканкама Юрый Мікалаевіч Кісялёў.

—            Юрый Мікалаевіч, якое месца ў рабоце раённай улады займае маладзёжная палітыка?

—            Яна заўсёды была і будзе прадметам павышанай увагі. Будучыня раёна, яго развіццё, стабільнасць, перспектывы напрамую залежаць ад падрыхтаванага, прафесійнага кадравага рэзерву. Таму ў райвыканкаме вя­дзецца няспынная работа як са старшакласнікамі, так і з маладымі людзьмі, якім на першапачатковым этапе самастойнага жыцця асабліва неабходна дзяржаўная падтрымка.

—            Як ніхто іншы, у ёй маюць патрэбу маладыя спецыялісты.

—            Кіраўніцтва раёна гэта добра разумее. Таму кожны год мы арганізуем сустрэчы маладых спецылістаў — спачатку ў афі­цыйнай абстаноўцы, затым — у  нефармальнай. Падчас такіх мерапрыемстваў выпускнікі маюць не толькі магчымасць пазнаёміцца адно з адным, але і задаць кампетэнтным асобам усе пытанні, якія хвалююць.

Летась на Пастаўшчыну прыехала 179 выпускнікоў вышэйшых, сярэдніх спецыяльных і прафесійна-тэхнічных навучальных устаноў. Практыка паказвае, што па заканчэнні тэрміну абавязковай адпрацоўкі ў раёне застаецца ў сярэднім 50%. На гэта ёсць і аб’ектыўныя, і суб’ектыўныя прычыны. Юнакі ідуць у армію, дзяўчаты выходзяць замуж і мяняюць месца прапіскі, а таксама ідуць у дэкрэтны водпуск. Іншагароднія спецыялісты — і гэта можна зразумець — імкнуцца дадому. Існуюць і іншыя прычыны, якія перашкаджаюць замацаванню моладзі ў раёне.

—           Якую з іх лічыце галоўнай?

—            Жыллёвую. Гэту праблему стараемся ўсімі сіламі вырашаць. Шэраг арганізацый і прадпрыемстваў аказвае матэрыяльную падтрымку ў аплаце здымнага жылля. Па магчымасці вы­дзяляецца інтэрнат — ён ёсць пры УП ЖКГ і прафтэхкаледжы.

Шмат пытанняў, у тым ліку і  жыллёвае, вырашае мэтавая падрыхтоўка спецыялістаў. Найбольш плённую работу ў гэтым кірунку вядуць цэнтральная раённая бальніца, аддзел адукацыі, спорту і турызму райвыканкама. А вось у сельскай гаспадарцы гэта работа пакуль не наладжана. На мой погляд, тут патрэбна больш актыўная пазіцыя наймальніка.

—            Як у цэлым у раёне арганізавана работа з моладдзю?

—            Яе курыруе галоўны спецыяліст аддзела ідэалагічнай работы, культуры і па справах моладзі райвыканкама Наталля Субко. Яна арганізуе шэраг мерапрыемстваў з удзелам маладых людзей — спартыўных, культурных, патрыятычных… Наталля Мечыславаўна заўсёды ў творчым пошуку, імкнецца знаходзіць новыя формы работы з маладой аўдыторыяй. Напрыклад, на ўра былі ўспрыняты спаборніцтвы па більярдзе, настольным тэнісе, якія летась праводзіліся ўпершыню. Штогод ладзіцца шэраг традыцыйных мерапрыемстваў — турыстычны злёт, маладзёжны форум, урачыстасці, прымеркаваныя да памятных дат, спартакіяда сярод маладых членаў добраахвотных дружын, тэматычныя дыскатэкі, спартыўныя і інтэлектуальныя спаборніцтвы, суботнікі і іншыя. У іх арганізацыі і правядзенні шмат дапамагаюць раённая арганізацыйная структура ДТСААФ, раённы аддзел унутраных спраў, аддзел адукацыі, спорту і турызму райвыканкама, камандаванне воінскіх часцей, кіраўнікі арганізацый і прадпрыемстваў.

—            Часта суарганізатарамі мерапрыемстваў выступае райкам Беларускага рэспубліканскага саюза моладзі.

—            Яму належыць вялікая роля ў рабоце з моладдзю. Сёння райкам аб’ядноўвае больш за тысячу маладых людзей Пастаўшчыны, рэалізуе шэраг  праектаў, праводзіць цікавыя конкурсы і мерапрыемствы, шмат увагі надае працоўнай занятасці моладзі ў летні перыяд.

—            Дзе паспелі праявіць сябе маладыя пастаўчане?

—            Усюды: і ў творчасці, і ў спорце. Але найперш на рабочых месцах. Многія маладыя людзі знаходзяцца ў перспектыўным кадравым рэзерве нашага раёна, і гэта падкрэслівае іх прафесіяналізм, адказныя адносіны да работы, давер кіраўнікоў. Сярод іх — Ігар Гіль (ААТ “Камайскі-агра”), Генадзій Васюковіч (Пастаўская ЦРБ), Вольга Іванова (Пастаўская дзіцячая школа мастацтваў імя Антонія Тызенгаўза), Алена Бурак (упраўленне сельскай гаспадаркі і харчавання райвыканкама), Сяргей Грыбоўскі (АБП “Рассвет Пастаўскі”), Аляксандр Заяц (АТП № 17), Ірына Кузьміч (Пастаўскі ТЦСАН), Юлія Юркова (райспажыўтаварыства), Аляксей Седзюкевіч (Варапаеўскі ДАК) і іншыя. Некаторыя з пералічаных маладых людзей ­удзельнічаюць у конкурсе прафесійнага майстэрства “Шлях да поспеху». Наогул, спіс тых, хто сумленна  шчыруе на карысць Пастаўшчыны, доўгі, і гэта радуе.

—            Што пажадаеце маладым людзям у іх свята? 

— Мэтанакіраванасці, здаровых амбіцый, сіл і натхнення. Не спыняцца на дасягнутым, крочыць наперад, быць патрыётамі сваёй малой радзімы. На Пастаўшчыне ёсць усе ўмовы для развіцця іх творчага і інтэлектуальнага патэнцыялу. Гэта даказваюць маладыя людзі, якія ўжо дасягнулі пэўных прафесійных вяршынь. Справа — у жаданні і імкненні працаваць.