Важкі ўклад кожнага

З нагоды прафесійнага свята — Дня друку — Пастаўскае аддзяленне гандлёвага рэспубліканскага ўнітарнага прадпрыемства “Віцебскаблсаюздрук” узнагароджана Ганаровай граматай абласнога выканаўчага камітэта.

— У гэтым заслуга ўсіх работні­каў, — адзначыла начальнік аддзялення Таццяна Іванаўна Рымко. — Нягледзячы на існуючыя праблемы (свайго транспарту не маем, і ўвесь тавар кіяскёрам трэба дастаўляць самім), людзі стараюцца. На маю думку, галоўнае ў тым, што ўсе яны вельмі любяць сваю работу, аддана служаць справе. Таму і вынікі добрыя.

З ліпеня 2012 года аддзяленне з’яўляецца міжраённым: да яго былі далучаны Браслаўскае і Шаркаўшчынскае. На цяперашні момант гэта 14 гандлёвых кропак: у Браславе — 4, у Шаркаўшчыне — 3, у Паставах — 7. У штаце ўсяго 20 чалавек. За 2013 год рэалізавана тавараў на 4 млрд 475 млн 785 тыс. рублёў, у тым ліку газет і часопісаў — на 2 млрд 148 млн. Нядрэнныя паказчыкі і за бягучы год. Агульны тавараабарот за студзень—красавік дасягнуў 1 млрд 747 млн 818 тыс. рублёў, пры гэтым газет і часопісаў насельніцтву рэалізавана на 911 млн 334 тыс. рублёў. Дарэчы, аддзяленне працуе і з арганізацыямі і прадпрыемствамі, адпускаючы ім тавар па пералічэнні (звычайна на 30—40 млн рублёў за месяц).

Хоць у рабоце кіёскаў “Белсаюздруку” асноўным з’яўляецца продаж газет і часопісаў, значны працэнт у структуры даходаў належыць таварам народнага ўжытку. Да патрэб пакупнікоў тут шырокі асартымент канцылярскіх, галантарэйных, парфумерных тавараў, кніжнай прадукцыі, календароў, плакатаў. Вялікім попытам у апошні час карыстаюцца калекцыйныя выданні — лялькі, азбука, вышыўка, іконы, жывапіс, машынкі і іншае. Рэалізуюцца прадукты (у цэласнай упакоўцы): шакалад, цукеркі, арэхі, пячэнне, чай, кава, семкі, а таксама тытунёвыя вырабы і нават посуд, коўдры, не кажучы ўжо пра разнастайны дробны тавар.

Адказна выконваюць ускла­дзеныя абавязкі ўсе. Але начальнік аддзялення сярод пастаўскіх кіяскёраў асабліва адзначала старанне Таццяны Іванаўны Баранавай, Аксаны Васільеўны Пачкоўскай, Галіны Бярнардаўны Міхасёнак, якія ў сваіх кіёсках  (два першыя — на плошчы імя Леніна, трэці — каля цэнтральнай раённай бальніцы) рэалізоўваюць тавараў за месяц адпаведна на 45—50, 43 і 31—32 млн рублёў. У дзвюх гандлёвых кропках (па вуліцы Юбілейнай і ў 5 гарадку) новыя работнікі: Тамара Іванаўна Бубновіч і Вольга Агафонаўна Сініцына. Але і іх уклад у агульны поспех, таксама як і бухгалтара аддзялення Леакадзіі Казіміраўны Дым і арганізатара рознічнага продажу Дануты Браніславаўны Ціхановіч, таксама важкі.

Галіна ПІШЧ.