“Важна ведаць вашы меркаванні”

Аляксей Аляксандравіч Клімовіч, Алег Леанідавіч Сліжэўскі, Анатоль Міхайлавіч Бабічаў

28 лютага Паставы наведаў міністр юстыцыі Рэспублікі Беларусь Алег Леанідавіч Сліжэўскі, які з’яўляецца членам рэспубліканскай інфармацыйна-прапагандысцкай групы.

Рабочы візіт міністра пачаўся са знаёмства з Пастаўскім мэблевым цэнтрам. Туды ён накіраваўся разам з памочнікам Аляксеем Аляксандравічам Клімовічам і выконваючай абавязкі начальніка галоўнага ўпраўлення юстыцыі Віцебскага аблвыканкама Марынай Фёдараўнай Быкавай. Экскурсію для ганаровых гасцей правёў дырэктар мэблевага цэнтра Анатоль Міхайлавіч Бабічаў, які расказаў пра работу прадпрыемства ў цэлым і асаблівасці вытворчасці ў кожным цэху.

У адным з іх А. Л. Сліжэўскі затрымаўся, каб пагутарыць з работнікамі. Ён коратка паведаміў ім пра функцыі Міністэрства юстыцыі, змены, якія праводзяцца апошнім часам у судовай галіне, а таксама асаблівасці нядаўняга рэфармавання органаў натарыята. Пры гэтым падкрэсліў, што прадстаўляе не асобнае міністэрства, а Урад, таму прапанаваў прысутным звяртацца з любымі хвалюючымі пытаннямі.

Іх аказалася нямала. Работнікі задалі пытанні, якія датычылі памераў пенсій, ільготнага крэдытавання, будаўніцтва жылля, у тым ліку і арэнднага. На іх адказалі міністр, а таксама начальнік аддзела ідэалагічнай работы, культуры і па справах моладзі райвыканкама Галіна Мікалаеўна Чаплінская, якая суправаджала яго падчас візіту на прадпрыемства.

—            Такія сустрэчы ў калектывах я праводжу штомесяц, — расказаў Алег Леанідавіч Сліжэўскі. — Яны служаць своеасаблівым мастком паміж грамадзянамі і Урадам і даюць магчымасць узняць набалелыя пытанні на найвышэйшым узроўні, атрымаць кампетэнтную інфармацыю. Мяне прыемна ўразілі і па-сучаснаму абсталяванае прадпрыемства, і ажыўленая дыскусія.

Для міністра таксама важна было пачуць ацэнку дзейнасці пастаўскага натарыята. Як аказалася, работнікі ПМЦ нярэдка туды звяртаюцца і характарызуюць яго работу толькі са станоўчага боку.  З дзейнасцю гэтай і іншай раённых службаў А. Л. Сліжэўскі пазнаёміўся асабіста. У другой палове дня ён наведаў ЗАГС, суд і аддзел прымусовага выканання Пастаўскага раёна, а таксама сустрэўся са старшынёй райвыканкама Віктарам Сяргеевічам Гутаравым.

Іна СНЯЖКОВА. Фота аўтара.