Майстэрства да Кіева давяло

11 лістапада майстар-кандытар філіяла «Каапгандаль №2 райспажыўтаварыства» Святлана Карандашова з самага ранку атрымлівала віншаванні ад калег, кіраўніцтва і спецыялістаў філіяла. Для гэтага была важкая падстава. Святлана Леанідаўна толькі што вярнулася з Кіева, дзе праходзіў адкрыты міжнародны турнір «Арт-дызайн кулінарнага майстэрства». Вярнулася не з пустымі рукамі, а з двума дыпломамі другой ступені і сярэбранымі медалямі. Гэтых узнагарод яна ўдастоена за высокі прафесіяналізм і майстэрства, прадэманстраваныя ў намінацыях «Цукровыя кветкі» і «Святочны торт».

У сталіцы Украіны, куды накіравала яе кіраўніцтва райспажыўтаварыства,  Святлана Карандашова прадстаўляла не толькі пастаўскіх кандытараў, але і ў цэлым школу кандытараў сістэмы Белкаапсаюза. І не падвяла, выступіла выдатна, акрамя ўзнагарод, у ліку нямногіх шчасліўчыкаў атрымала яшчэ і сертыфікат на бясплатнае двухтыднёвае навучанне ў Кіеўскай акадэміі шэф-повараў і кандытараў.

На міжнародны тур­нір Святлана Леанідаўна прывезла цукровы букет у выглядзе звычайных кветак, якія растуць у агародчыку. Работа была доўгай і карпатлівай, бо кожны пялёстак, лісцік — а іх  сотні розных відаў і фарбаў — трэба было вырабіць уручную. Дапамаглі натхненне, творчасць, захопленасць.

Майстар-кандытар лічыць, што мяжы для самаўдасканалення не існуе. А гэта значыць, што яе залатыя рукі будуць тварыць з цукровай пасты новыя цуды ў выглядзе букетаў, кветкавых кампазіцый, упрыгожаных тортаў. А да ўзнагарод, заваяваных цяпер і на міжнародным чэмпіянаце кандытарскага мастацтва, які праходзіў у Мінску ў верасні, абавязкова дабавяцца новыя.

Тэкст і фота Пятра КУРЫЛОВІЧА.