Падвялі вынікі фармацэўты

29 кастрычніка на базе цэнтральнай аптэкі №87 у Паставах прайшла абласная нарада па выніках работы за 9 месяцаў 2013 года Віцебскага УП «Фармацыя».

Удзел у рабоце нарады прынялі начальнікі аддзелаў і службаў абласнога прадпрыемства, загадчыкі ўсіх аптэк Віцебшчыны. У якасці гасцей на ёй прысутнічалі галоўны ўрач Пастаўскай ЦРБ У. М. Чакавы і старшыня раённага Савета дэпутатаў В. П. Арэхаў. 3 дакладам па тэме перад прысутнымі выступіла генеральны дырэктар Віцебскага УП «Фармацыя» А. А. Арлова. Яна расказала, якіх вынікаў удалося дасягнуць прадпрыемству за азначаны перыяд часу ў фінансава-гаспадарчай і фармацэўтычнай дзейнасці. Гаворку прадоўжылі кіраўнікі гарадскіх і раённых аптэк, якія падзяліліся сваімі праблемамі і дасягненнямі, выказалі сваё бачанне шляхоў паляпшэння далейшай работы.

Удзельнікі мерапрыемства мелі магчымасць таксама наведаць некалькі аптэк раёна — дунілавіцкую, пры Пастаўскай ЦРБ і цэнтральную раённую, якая за апошні час непазнавальна змяніла сваё аблічча. Два гады таму быў праведзены капітальны рамонт звонку і ўнутры будынка. А сёлета, рыхтуючыся да нарады, за сродкі, выдзеленыя абласным прадпрыемствам, добраўпарадкаваны двор: пакладзена тратуарная плітка, абшыта металапрофілем павець для захоўвання паліва, устаноўлены каваныя вароты і агароджа, столік і лавачкі ля яго, пафарбавана жалезабетонная агароджа. Усё ўбачанае было высока ацэнена калегамі пастаўскіх фармацэўтаў з іншых раёнаў.

Прымаючы гасцей, гаспадары паклапаціліся і пра іх адпачынак у выглядзе экскурсіі па горадзе. Удзельнікі нарады пабывалі ў палацы Тызенгаўзаў, царкве і касцёле, дзе паслухалі арган.

Алена ШАПАВАЛАВА.