На базе Пастаўскага раёна прайшоў абласны семінар-нарада

Завяршаецца сельскагаспадарчы год. У полі засталіся толькі трактары, якія вядуць зяблевае ворыва. Астатняя тэхніка павінна быць пастаўлена на працяглае захоўванне і ў залежнасці ад стану пачаты яе рамонт. Гэтым пытанням, а таксама падрыхтоўцы рамонтнай базы для работы ў зімовых умовах быў прысвечаны абласны семінар-нарада, які 1 лістапада прайшоў на базе нашага раёна.

У ім удзельнічалі старшыня абласнога камітэта па сельскай гаспадарцы і харчаванні С. А. Догель, начальнікі аддзелаў і галоўныя спецыялісты ўпраў­лення механізацыі аблсельгасхарчу, намеснікі начальнікаў райсельгасхарчаў па механізацыі, начальнікі раённых інспекцый “Дзяржтэхнагляду”, кіраўнікі рамонтных прад­прыемстваў і арганізацый вобласці.

Практычная частка семінара пачалася з наведвання філіяла “Нафтазаводмантаж-агра” і аддзялення “Варапаева” ААТ “Пастаўскі райаграсэрвіс”, дзе яго ўдзельнікі азнаёміліся з работай па аптымізацыі тэрыторыі і навядзенні парадку на машынных дварах, падрыхтоўкай рамонтнай базы да работы ў зімовых умовах, пастаноўкай зернеўборачных камбайнаў і іншай сельскагаспадарчай тэхнікі на працяглае захоўванне, стварэннем бяспечных умоў працы пры правядзенні рамонтных работ. Аб гэтым расказалі дырэктар філіяла М. А. Лаўцэвіч і галоўны інжынер райаграсэрвісу М. І. Бутар.

Асабліва карысным атрымалася наведванне машыннага двара ў Ляхаўшчыне. Кіраўніцтва філіяла і галаўнога прадпрыемства сёлета правялі яго аптымізацыю, у выніку чаго тэрыторыя двара стала больш кампактнай. Яна  абгароджана, зроблена падсыпка, у пэўным парадку выдзелены і абазначаны таблічкамі  пляцоўкі для захоўвання складанай сельскагаспадарчай тэхнікі і машын, металалому, утылізаваных шын, наведзены парадак на іншых аб’ектах машыннага двара.

На нарадзе была разгледжана і зацверджана абласная праграма падрыхтоўкі сельскагаспадарчай тэхнікі да правядзення палявых работ у 2014 годзе, прааналізаваны ход выканання праграм энергазберажэння, будаўніцтва новых і мадэрнізацыі дзеючых зернесушыльных комплексаў, выканання дзяржзаказу па здачы металалому ў 2013 годзе.

Былі разгледжаны таксама пытанні арганізацыі і здачы ў рамонт вузлоў, агрэгатаў і поўнакамплектных машын на падведамных прадпрыемствах ААТ “Віцебскі аблаграсэрвіс”, правядзення тэхнічнага абслугоўвання трактароў “Беларус-3022”, корма- і зернеўборачных камбайнаў, выканання іншых работ, звязаных з падрыхтоўкай тэхнікі. З інфармацыямі і паведамленнямі выступілі  начальнікі аддзелаў,  інспектары і ін­шыя спецыялісты аблсельгасхарчу і абласных тэхнічных службаў.

Вынікі работы нарады падвёў старшыня абласнога камітэта па сельскай гаспадарцы і  харчаванні С. А. Догель.

Пётр КУРЫЛОВІЧ.