Згулялі як па нотах

Чэмпіянат Беларусі па футболе — 2013/14 (U-17)

“Тарпеда-БелАЗ” (Жодзіна) – “ПМЦ-Паставы” – 0:5

Юным пастаўчанам выпаў гонар згуляць гэты матч адкрыцця на новым запасным полі прыгожага гарадскога стадыёна ў Жодзіне са штучным газонам найноўшага пакалення. Тэхнічным і набраўшым добрую спартыўную форму на фінішы сезона выхаванцам футбольнай акадэміі ПМЦ у такіх цудоўных умовах заставалася толькі згуляць у сваё задавальненне. Гэта сустрэча прайшла з велізарнай гульнявой і тэрытарыяльнай перавагай гасцей, а іх сапернік змог стварыць толькі два паўмоманты для ўзяцця варот, але да заключных удараў справу так і не давёў.

А вось пастаўчане з самага пачатку прыняліся метадычна разбураць абарончыя рэдуты жодзінцаў, якім прыйшлося вельмі цяжка. Госці адкрылі лік на 12-ай хвіліне пасля слаламнага праходу Андрэя Вілейты, калі яго ўдар адбіў варатар тарпедаўцаў, але мяч падхапіў Аляксандр Александровіч і прабіў бездакорна. Неўзабаве ў абдымкі партнёраў трапіў нападаючы юна­ц­кай зборнай Беларусі Ілья Кухарчык пасля выхаду без перашкод на ўдарную пазіцыю. Ні­якіх шанцаў выраўняць гульню каманда ПМЦ жодзінцам не пакінула, перад свістком на перапынак А. Александровіч яшчэ раз засмуціў саперніка.

Асноўны распасоўшчык пастаўчан у пачатку другога тайма вызначыўся ў трэці раз, калі выйграў рандэву з галкіперам тарпедаўцаў. На поле выйшлі рэзервісты ПМЦ, але характар гульні не змяніў­ся, а за 3 хвіліны да завяршэння матча Ілья Кухарчык аддаў вывераны пас свайму таварышу Івану Беразуну, які і паставіў канчатковую кропку. Восьмую па ліку перамогу ў сезоне забяспечылі на выездзе Чашун (Рабцэвіч), Камісарчук, Ванда (к), Сакалоў, Дубін, Бяльчонак (Худой), Лузан, Александровіч (Пучынскі), Павініч (Беразун), Кухарчык, Вілейта (Жалезнікоў).

У наступным матчы дня маладзейшых каманд ва ўзросце да 15 гадоў была больш упартая барацьба. Адзіны пераможны гол удалося правесці паўабаронцу “ПМЦ-2” Аляксандру Сароку на 18-ай хвіліне сустрэчы, што дазволіла гасцям з добрым настроем завяршыць свой чарговы паядынак. Да заканчэння першага круга нацыянальнага першынства абедзвюм нашым камандам засталося правесці па 3 сустрэчы, яны па-ранейшаму знахо­дзяцца сярод асноўных прэтэндэнтаў на заваяванне медалёў.

Уладзімір ШЫК.