Уступіла толькі віцебскім цырульнікам

У нядзелю, 20 кастрычніка, лепшыя цырульнікі вобласці сабраліся ў Віцебску, каб прыняць удзел у традыцыйным конкурсе цырульніцкага майстэрства. Яго арганізатар — дзяржаўная установа «Упраўленне бытавога абслугоў­вання насельніцтва Віцебскай вобласці». Конкурс праводзіцца з перыядычнасцю раз у два гады.

Сёлета конкурс праходзіў на базе цырульні ААТ «Мир услуг Плюс». Для ўдзелу ў ім былі запрошаны прыватныя структуры, навучальныя ўстановы, якія рыхтуюць цырульнікаў, і прадпрыемствы вобласці. Паставы прадстаўляла Анастасія Ляпіліна. У галіне дзяўчына 4 гады. Спачатку працавала касірам-прыёмшчыкам, на падмене — цырульнікам. Працаваць у жаночую залу перайшла год таму. За гэты час зарэкамендавала сябе толькі са станоўчага боку — безадмоўная, ініцыятыўная, прыхільніца ўсяго новага. Напэўна, таму ўдзельнічаць у конкурсе цырульніцкага майстэрства прапанавалі менавіта ёй. Дзяўчына, не раздумваючы, згадзілася, сама вызначылася з выбарам намінацыі, знайшла мадэль.

Для Анастасіі ўдзел у такім конкурсе ў навіну, таму моцна хвалявалася. Тым больш што канкурыраваць удзельніцам з Пастаў і Чашнікаў прыйшлося з вельмі моцнымі сапернікамі з Віцебска, Полацка, Наваполацка і Оршы.

— Хоць я і хвалявалася, але ў сваіх сілах не сумнявалася, ведала, што пакажу добры вынік, — дзеліцца нядаўнімі трывогамі Анастасія Ляпі­ліна. — На конкурсе рабіла асіметрычную стрыжку, валасы мадэлі (угаварыла ёй быць сваю сяброўку) пафарбавала ў 4 колеры. Атрымалася ярка і прыгожа. На выкананне ўсіх заданняў — а гэта стрыжка і ўкладка валасоў, нанясенне макіяжу, падбор убору і ўпрыгожванняў — мне і іншым юніёрам (да 25 гадоў) адводзілася 45 хвілін, астатнім цырульнікам — 40. Пасля завяршэння конкурсу члены журы разбіралі кожную работу індывідуальна. Асаблівая ўвага звярталася на недахопы, у пэўным сэнсе атрымаўся семінар-вучоба. Абавязкова буду кіравацца ў рабоце тымі сакрэтамі, якія мне адкрылі прызнаныя майстры.

Надзеі Анастасіі Ляпілінай паказаць добры вынік на конкурсе апраўдаліся — у намінацыі «Модная жаночая стрыжка з укладкай» яна заняла трэцяе месца, саступіўшы пальму першынства толькі абласным цырульнікам з ААТ «Мир услуг Плюс». Такім вынікам сваёй падапечнай дырэктар Пастаўскага райбыткамбіната Таццяна Аркадзьеўна Гладковіч задаволена:

— Мэта такіх конкурсаў — павышэнне прафесіяналізму майстроў-цырульнікаў, абмен вопытам, перадавымі тэхналогіямі і кірункамі. Гэта асабліва актуальна для спецыялістаў з такіх невялікіх гарадоў, як наш, — дзеліцца ўражанямі Таццяна Аркадзьеўна. — Акрамя таго, што Насця ўзбагацілася новымі ведамі, па выніках конкурсу ёй устаноўлена штомесячная надбаўка за прафмайстэрства ў памеры 15% ад тарыфнай стаўкі, будзе павышаны разрад з 4-га да 5-га. У далейшым дзяўчыну, безумоўна, чакае прафесійны рост.

Па выніках абласнога конкурсу сфарміравана зборная каманда Віцебшчыны для ўдзелу ў чэм­піянаце Рэспублікі Беларусь па цырульніцкім майстэрстве «Стыль і прыгажосць», які адбудзецца 7-9 лістапада ў Мінску. Прыняць удзел у чэмпіянаце запрасілі і Анастасію Ляпіліну.

Вераніка ФІЛАНОВІЧ.

Фота прадстаўлена А. ЛЯПІЛІНАЙ.