У казацкім аддзеле — папаўненне

Для жыхароў Пастаў ужо стала звычайным бачыць казакаў у царкве, падчас   патрулявання ў горадзе, пры правядзенні свят і іншых масавых мерапрыемстваў. Яны частыя госці ў школьнікаў, не толькі выступаюць перад імі, але і дапамагаюць арганізоўваць і праводзіць святы, сустрэчы. Нядаўна каманда казацкага аддзела заняла першае месца ў раённай спартакіядзе сярод добраахвотных дружын. Нягледзячы на тое, што гэта грамадскае фарміраванне з’яўляецца адным з самых маладых, яго члены ўсё часцей заяўляюць пра сябе актыўнай работай у розных кірунках.

Папаўняюцца і рады казацтва. Вось і ў мінулую суботу ля пастаўскага храма Святога Мікалая Цудатворца адбылася цырымонія прыняцця Казацкага слова (прысягі) маладым пастаўчанінам Іванам Шкорнікам. Сёлета ён закончыў Пастаўскі дзяржаўны прафтэхкаледж сельскагаспадарчай вытворчасці, цяпер працуе на прадпрыемстве меліярацыйных сістэм. Па добрай традыцыі да прыняцця Казацкага слова Івану быў дадзены выпрабавальны тэрмін, на працягу якога будучы казак знаёміўся са Статутам рэспубліканскага грамадскага аб’яднання “Беларускае казацтва”, яго гісторыяй, спраўляў сабе форменнае адзенне, удзельнічаў у жыцці арганізацыі. Перад урачыстым прыняццем абяцання, як і належыць сапраўднаму хрысціяніну, ён спавядаўся і прычашчаўся ў царкве.

Прыняцце Казацкага слова праходзіла пры непасрэдным удзеле духоўнага настаўніка пастаўскіх казакаў протаіерэя Валерыя Пашкевіча, намесніка Вярхоўнага атамана казацкага палкоўніка Г. А. Жумянка, начальніка юрыдычнага аддзела РГА “Беларускае казацтва” казацкага генерала С. М. Нікалаенкі, а таксама казакаў з Мінскага і Жодзінскага ад­дзелаў.

Пасля таго, як Іван Шкорнік прамовіў тэкст прысягі, ён прыклаўся да крыжа і сцяга грамадскага аб’яднання, які для рытуала спецыяльна прывезлі з Мінска. Уступаючы ў рады Беларускага казацтва, юнак урачыста паабяцаў быць верным праваслаўнай хрысціянскай веры, добрасумленным, храбрым і дысцыплінаваным, не парушаць свайго слова з-за карыслівасці, роднасці, дружбы або варожасці.

Іван Шкорнік атрымаў віншаванні з прысваеннем яму першага чына — казак — ад кіраўніцтва РГА “Беларускае казацтва”, вайсковага старшыны Пастаўскага казацкага аддзела А. М. Зазуліна, а таксама намесні­ка старшыні райвыканкама Ю. М. Кісялёва, які станоўча ацаніў дзейнасць грамадскай арганізацыі, выказаў надзею, што пакладзеныя ў яе аснову ідэалы будуць пашырацца сярод моладзі, служыць на карысць Айчыны.

Суботняя ўрачыстасць стане памятнай і для падесавула Дзмітрыя Плешавені, які атрымаў узнагароду за аса­бісты ўклад у перамогу каманды Пастаўскага казацкага аддзела на раённых спаборніцтвах сярод добраахвотных дружын.

Тэкст і фота Пятра КУРЫЛОВІЧА.