“Ветразь” дапамагае інвалідам

Кожны месяц больш за 250 дзяцей з розных гарадоў і раёнаў Прыдзвінскага краю праходзяць курс лячэння ў абласным дзіцячым рэабілітацыйна-аздараўленчым цэнтры “Ветразь”. А гэтай восенню колькасць пацыентаў  часова павялічылася яшчэ на 40 чалавек. Імі сталі інваліды-калясачнікі і тыя, хто наведвае ў Паставах аддзяленне адаптацыі, рэабілітацыі і дзённага знаходжання тэрытарыяльнага цэнтра сацыяльнага абслугоўвання насельніцтва.

Гэта стала магчымым дзякуючы дамоўленасці аб аздараўленні інвалідаў, якая была дасягнута паміж дырэкцыяй цэнтра і ўпраўленнем па працы, занятасці і сацыяльнай абароне райвыканкама. Дабрачынная акцыя, да якой далучылася і цэнтральная райбальніца, праходзіць пад назвай “За здароўе — разам!” і пакуль з’яўляецца адзінай такога роду на Віцебшчыне.

— У нашай установе створана добрая база для правядзення комплексу медыцынскіх мерапрыемстваў па аднаўленні і ўмацаванні здароўя дзяцей, —  адзначыў галоўны ўрач аздараўленчага цэнтра Ула­дзімір Нікіфараў. — Таму, калі паступіла прапанова ад кіраўніцтва раённай сацыяльнай службы аказаць дапамогу інвалідам, мы падтрымалі яе. Урачамі  кожнаму індывідуальна былі назначаны водалячэбныя,  фізіятэрапеўтычныя і іншыя працэдуры. Медыцынскі персанал з  вялікай адказнасцю і разуменнем аднёсся да новых пацыентаў, а тыя, у сваю чаргу, з задавальненнем прымаюць усе назначэнні,  пасябравалі з медработнікамі.

Усе клопаты па дастаўцы інвалідаў да месца аздараўлення ўзяў на сябе тэрытарыяльны цэнтр сацыяльнага абслугоўвання насельніцтва. Побач з імі пастаянна знаходзяцца загадчыца Вольга Гінько або спецыялісты аддзялення дзённага знахо­джання  Крысціна Патаровіч, Ганна Мураўская і Барыс Шыман. З гатоўнасцю прыходзяць на дапамогу інвалідам-калясачнікам і вадзіцелі Сяргей Смірноў і Юрый Каравацкі.

Акцыя доўжыцца ўжо амаль два месяцы. І не было такога дня, каб не захоўваўся графік работы, каб хтосьці з інвалі­даў спазніўся або адмовіўся ад бясплатнай дапамогі. Своечасовай і патрэбнай назвала яе Ала Дзямідка, якая стала калясачніцай у сямі­гадовым узросце. Яна выказала пажаданне, каб такія акцыі праводзіліся часцей, бо масаж, іншыя працэдуры вель­мі патрэбны людзям з абмежаванымі магчымасцямі.

— Мне тут вельмі спадабалася, — сказала яшчэ адна з пацыентак Оля Гуль. — Акрамя агульных працэдур, якія прымала, за некалькі сеансаў змагла пазбавіцца ад прастуднага захворвання. А якія прыветлівыя тут дзяўчаты і жанчыны! Ад іх нібы зыходзіць энергія, якая супакойвае,  радасным робіць  знаходжанне ў цэнтры.

Медыцынскія і сацыяльныя работнікі пераканаліся ў тым, што праведзеная ў горадзе акцыя пад назвай “За здароўе — разам!”  аказалася вельмі карыснай для інвалідаў і павучальнай для саміх у плане арганізацыі і правядзення такіх мерапрыемстваў. Вырашана, што і ў далейшым на такой або іншай аснове гэту работу абавязкова трэба праводзіць.

Тэкст і фота Пятра КУРЫЛОВІЧА.