Содержательно отдохнуть помогли соседи

Настаўнікі пастаўскай дзіцячай школы мастацтваў імя Тызенгаўза Наталля Пылева, Наталля Белікава, Антаніна Падгайская і Наталля Крупадзёрава ўзнагароджаны Ганаровымі граматамі аддзела ідэалагічнай работы, культуры і па справах моладзі райвыканкама.

Некалькі незвычайна, а таму і адметна адзначылі сваё прафесійнае свята культработнікі Пастаўшчыны. Іх сустрэча ў раённым Доме культуры ў такім пашыраным складзе была, бадай, першай пасля праведзенай у дзяржаўных органах краіны рэструктурызацыі, у выніку якой у раённым выканаўчым камітэце быў створаны аддзел ідэалагічнай работы, культуры і па справах моладзі. Структура ж устаноў, поле іх дзейнасці засталіся ранейшымі. А таму і не затухае, напаўняецца новым зместам культурнае жыццё гараджан і вяскоўцаў.

— Пастаўчанам пашанцавала жыць і працаваць у рэгіёне, багатым сваімі музычнымі традыцыямі, народнай творчасцю, захопленымі ўдзельнікамі і арганізатарамі мастацкай самадзейнасці, мерапрыемствамі самага высокага ўзроўню, — адзначыў намеснік старшыні райвыканкама Юрый Кісялёў. — Чаго варта толькі тое, што ў нас плённа працуюць 12 народных і 4 узорныя калектывы,  адзін заслужаны аматарскі калектыў і 5 членаў Саюза народных майстроў Рэспублікі Беларусь. Аб’ядноўваючым цэнтрам аргані­зацыі культурных мерапрыемстваў з’яўляецца раённы Дом культуры са сваім таленавітым, творчым калектывам. Годна выконваюць сваю выхаваўчую і прафесійную місію дзіцячыя мастацкія школы. Не губляе сваёй прыцягальнасці раённая бібліятэчная сістэма. Візітнай карткай горада стаў Дом рамёстваў “Стары млын”. У пастаянным творчым пошуку знаходзіцца калектыў раённага краязнаўчага музея. І хаця ўстановы культуры сёння перажываюць пэўныя фінансавыя цяжкасці, гэта не адбіваецца на творчым жыцці раёна, бо яго арганізатарамі пераважна з’яўляюцца кваліфі­каваныя, адданыя справе, ініцыятыўныя работнікі.

Пра іх прафесіяналізм, непадзельнасць ідэалагічнай, культурнай і выхаваўчай работы ў маладзёжным асяродку гаварыла начальнік аддзела ідэалагічнай работы, культуры і па справах моладзі райвыканкама Галіна Чаплінская. Яна, у прыватнасці, падкрэсліла, што работнікам культуры Пастаўшчыны ўласцівы творчасць,  добрасумленнасць, уменне знаходзіць выйсце з самых розных сітуацый. А таму сумесныя дзеянні павінны быць яшчэ больш плённымі і выніковымі.

Самым актыўным і творчым на свяце былі ўручаны ўзнагароды раённага выканаўчага камітэта і аддзела ідэала­гічнай работы, культуры і па справах моладзі. Ветэранам падарылі кветкі, а маладым работнікам — дырэктару  Ляхаўшчынскага СДК Тэрэзе Антух і акампаніятару Юнькаўскага СДК Віялеце Лешчык — быў уручаны сімвалічны Агонь творчасці. Перадаючы яго, былая загадчыца аддзела культуры райвыканкама Наталля Булавінцава пажадала дзяўчатам творчасці, вялікіх арганізатарскіх здольнасцей, душэўнага падыходу да людзей і праводзімых мерапрыемстваў.

Былыя загадчыцы аддзела культуры райвыканкама І. К. Касаткіна і Н. М. Булавінцава ўручаюць сімвалічны Агонь творчасці маладым спецыялістам.

У культработнікаў такія абавязкі, што калі ўсе адпачываюць, ім прыходзіцца працаваць. На гэты раз арганізатары культурнага жыцця былі ў якасці гледачоў, бо запрасілі на сваё свята калег і ўдзельнікаў мастацкай сама­дзейнасці Глыбоцкага ГДК. Танцавальны калектыў і саліс­ты, вядучыя канцэртнай праграмы захапілі высокім выканальніцкім майстэрствам, маладосцю, прыгажосцю касцюмаў. Сустрэча з глыбачанамі атрымалася яркай і запамінальнай. Вось і падумалася: і ў далейшым добра было б знаёміць пастаўчан з творчасцю суседзяў, бо кожны рэгіён у сваім культурным жыцці адметны і непаўторны.

Тэкст і фота Пятра КУРЫЛОВІЧА.