По количеству новорожденных Поставщина лидирует в области

14 кастрычніка віншаванні з Днём маці прымалі тысячы жанчын Пастаўшчыны. Сярод іх былі і тыя, хто сустрэў свята ў ра­дзільным аддзяленні раённай бальніцы. Да іх з цёплымі словамі і падарункамі завіталі намеснік старшыні райвыканкама Юрый Мікалаевіч Кісялёў, старшыня раённай арганізацыі Беларускага таварыства Чырвонага Крыжа Яніна Вячаславаўна Савіцкая і галоўны ўрач Пастаўскай ЦРБ Уладзімір Мікалаевіч Чакавы.

Першым да прысутных звярнуўся Ю. М. Кісялёў:

—   Як прыемна ў гэты дзень бачыць шчаслівыя ўсмешкі маладых маці! Вы — сапраўдныя гераіні. Ваша роля ў грамадстве была і будзе ганаровай, адказнай, неацэннай. Без лішняга красамоўства скажу, што менавіта ад жанчын залежыць будучыня як кожнай асобнай сям’і, так і краіны ў цэлым. Дзякуй вам за тое, што вы жывяце клопатам пра сваіх дзяцей. Няхай іх колькасць толькі прымнажаецца, а ў дамах пануюць радасць і дабрабыт, — пажадаў ён.

З шасці прысутных маладых жанчын толькі адна адчула шчасце мацярынства ўпершыню, астатнія — у другі, трэці раз. Цікава, што сярод нованароджаных толькі адна дзяўчынка, усе астатнія — хлопчыкі. Кожны з дзетак у той дзень атрымаў ці не першыя ў жыцці падарункі — цацкі і адзенне. Адна з мацярок атрымала больш важкую гуманітарную дапамогу, бо знаходзіцца ў цяжкім матэрыяльным стано­вішчы.

Падарункі ўручыла Я. В. Савіцкая. Яна адзначыла, што ў раённай арганізацыі таварыства Чырвонага Крыжа даўно стала традыцыяй ушаноўваць маці ў іх “прафесійнае” свята. І падкрэсліла: радуе той факт, што год ад году падарункаў трэба збі­раць усё больш.

—   Па колькасці нованароджаных Пастаўскі раён лідзіруе ў вобласці, — пракаменціраваў У. М. Чакавы. — За 9 месяцаў гэтага года нарадзілася 317 дзетак (на 25 больш, чым за такі ж перыяд 2012-га). Сёлета чакаецца яшчэ каля пяці­дзесяці родаў.

Цешыць тое, што ўсё часцей дзеткі з’яўляюцца ў пар, якія нядаўна маглі пра іх толькі марыць. Медыцына не стаіць на месцы. На новы ўзровень выходзіць лячэнне хвароб, якія перашкаджаюць жанчынам зацяжарыць. А значыць, у сем’ях дзіцячы смех будзе гучаць яшчэ часцей.

Іна СНЯЖКОВА.

Фота аўтара.