В 58-ой раз открыл свои двери

У панядзелак раніцай унутраны дворык Пастаўскага каледжа быў запоўнены да адказу. На традыцыйную лінейку, прысвечаную пачатку новага навучальнага года, тут сабраліся вучні, іх бацькі, выкладчыкі і ганаровыя госці.

Пачаўся Дзень ведаў у дзяржаўным прафесійна-тэхнічным каледжы сельскагаспадарчай вытворчасці з узняцця Дзяржаўнага сцяга. Гэта ганаровая місія была прадастаўлена найлепшым навучэнцам узроўню сярэдняга спецыяльнага навучання — Яшкінай Наталлі і Цяляк Алесі. Як толькі змоўклі гукі Гімна Рэспублікі Беларусь, да прысутных звярнуўся дырэктар каледжа Мікалай Мікалаевіч Лысёнак. Сваё выступленне ён пачаў з гісторыі навучальнай установы, поспехаў і дасягненняў навучэнцаў.

— За гады свайго існавання (а ў гэтым годзе каледж у 58-ы раз расчыніў свае дзверы для першакурснікаў) тут падрыхтавана больш за 20 тысяч рабочых і спецыялістаў. Прозвішчы нашых выпускнікоў гучаць не толькі на раённым і абласным, але і на рэспубліканскім і міжнародным узроўнях. Спа­дзяюся, што і ўсе вы станеце добрымі спецыялістамі і будзеце радаваць сваімі навыкамі і ведамі педагогаў і будучых наймальнікаў, — выказаў надзею М. М. Лысёнак.

Дырэктар з гонарам адзначыў, што мінулы навучальны год склаўся ўдала. Па яго выніках, каледж стаў лепшай навучальнай установай па паспяховасці — 77 % навучэнцаў скончылі вучобу на 6-10 балаў. Не зафіксавана ніводнага злачынства, значна знізілася колькасць адміністрацыйных і дысцыплінарных правапарушэнняў. Па вы­ніках удзелу ў конкурсах і спаборніцтвах навучэнцы ўзнагароджаны шматлікімі граматамі, дыпломамі і прызамі.

— Веру, што і першакурснікі будуць годна прадстаўляць каледж і працягваць традыцыі, якія склаліся ў нашай навучальнай установе. Вы павінны ганарыцца, што вучыцеся тут, і рабіць усё для таго, каб пра каледж гаварылі толькі добрае. Творчых поспехаў, моцнага здароўя, дабрабыту! Радуйце сваіх выкладчыкаў і бацькоў, — падсумаваў дырэктар каледжа.

Словы наказу навучэнцам каледжа гучалі і з вуснаў ганаровых гасцей. Начальнік штаба раённага аддзела ўнутраных спраў Андрэй Васільевіч Клімюк заклікаў падтрымліваць імідж горада і раёна, сачыць за правапарадкам і сустракацца толькі на такіх урачыстых мерапрыемствах. Начальнік аддзела арганізацыйна-кадравай работы райвыканкама Уладзімір Зіноўевіч Гутар пажадаў поспехаў у вучобе і адзначыў, што ад таго, наколькі трывалымі будуць уменні і навыкі выпускнікоў каледжа, будуць залежаць іх далейшы прафесійны рост і жыццё ў цэлым. Па даручэнні старшыні райвыканкама Уладзімір Зіноў­евіч уручыў Ганаровую грамату райвыканкама намесніку дырэктара па вучэбна-выхаваўчай рабоце Дубовік Алене Канстанцінаўне за шматгадовую добрасумленную працу па падрыхтоўцы кваліфікаваных рабочых кадраў і актыўны ўдзел у грамадскім жыцці.

Прымалі на ўрачыстай лінейцы ўзнагароды і навучэнцы. За выдатную вучобу Наталлю Яшкіну, Алесю Цяляк, Валянціну Далідзёнак і Ірыну Вярцінскую (на фота) прафсаюз работнікаў аграпрамысловага комплексу адзначыў грашовымі прэміямі.

Пасля завяршэння ўрачыстай лінейкі ў актавай зале каледжа адбыўся арганізацыйны сход. Наперадзе рабят чакае новы навучальны год. Пачнецца ён з працы на палетках сельгасарганізацый раёна. Дапамагаць вяскоўцам адправяцца 240 чалавек, яшчэ 8 будуць задзейнічаны на будаў­ніцтве ферм. Тым жа, хто хацеў бы працягнуць сваё навучанне ў каледжы, але па нейкіх прычынах не паспеў падаць дакументы, варта паспяшацца. Нягле­дзячы на тое, што навучальная ўстанова цалкам выканала план прыёму і прыступіла да навучальнага працэсу, прыём дакументаў працягнецца да 15 верасня. Набор ідзе па ўсіх кваліфікацыях, за выключэннем повараў.

Вераніка ФІЛАНОВІЧ.