Глубоких знаний и отличных оценок! (+фото)

2 верасня ва ўсіх школах Пастаўшчыны адбыліся лінейкі з нагоды пачатку новага навучальнага года. У Дунілаві­чах яна была асабліва ўрачыстай. Павіншаваць дзяцей і настаўнікаў са святам першага званка сюды прыехалі ганаровыя госці — старшыня Камітэта дзяржаўнага кантролю Рэспублікі Беларусь Аляксандр Серафімавіч Якабсон і першы намеснік старшыні Камітэта дзяржаўнага кантролю Віцебскай вобласці Вадзім Уладзіміравіч Заранкін.  

Прысутнічалі на свяце і прадстаўнікі раённай улады — старшыня райвыканкама Віктар Сяргеевіч Гутараў, яго намеснік Юрый Мікалаевіч Кісялёў, а таксама старшыня аддзела адукацыі, спорту і турызму райвыканкама Аляксандр Яў­геньевіч Кашырын.

Урачыстасць пачалася  з падняцця Дзяржаўнага сцяга. Права гэта зрабіць было прадастаўлена лепшым вучням школы, пераможцам і прызёрам раённых і абласных алімпіяд — адзінаццацікласнікам Віялеце Кароль і Антону Шубко.

Першым да педагогаў, школьнікаў і іх бацькоў звярнуўся дырэктар Дунілавіцкай сярэдняй школы, заслужаны настаўнік Рэспублікі Беларусь Васілій Аляксандравіч Бульбяноў. “Пакуль старанна вучацца дзеці, нашай краіне жыць і квітнець”, — упэўнены ён. Сваім падапечным ён пажадаў натхнення вучыцца, глыбокіх ведаў і выдатных адзнак.

Прывітаў удзельнікаў свята і Аляксандр Серафімавіч Якабсон.

—         У Беларусі робіцца ўсё, каб сістэма адукацыі была на самым дастойным узроўні, — адзначыў ён. — Яе фінансаванне ў рамках дзяржбюджэту павялічваецца, што, несумненна, радуе. Як гэтага не рабіць, калі выпускнікі нашых школ паказваюць выдатныя веды і дасягаюць у жыцці самых высокіх вяршынь? Перад пачаткам лінейкі мне расказалі, што выпускнікі Дунілавіцкай школы працуюць як механізатарамі, так і генеральнымі канструктарамі і галоўнымі інжынерамі на буйных прадпрыемствах краіны. Як не ганарыцца такімі людзьмі? Спадзяюся, што вы таксама ў далейшым зможаце рэалізаваць сябе і пры гэтым абавязкова будзеце памятаць і любіць сваю родную школу. Віншую ўсіх вас з гэтым цудоўным святам і жадаю заўсёды крочыць па жыцці з высока паднятай галавой, не забываючы пры гэтым, што дзяржава заўсёды на вашай абароне.

Эстафету віншаванняў прадоўжыў Віктар Сяргеевіч Гутараў. Ён паведаміў, што напярэдадні новага навучальнага года ў школах праведзена вялікая падрыхтоўчая работа, і паабяцаў, што раённыя ўлады і надалей будуць максімальна падтрымліваць сістэму адукацыі. У якасці падарунка ён уручыў школе відэакамеру.

Не з пустымі рукамі пакінулі ўрачыстасць перша­класнікі. А. С. Якабсон перадаў ім падарункі ад Прэзідэнта — кнігі “Беларусь — наша Радзіма”. Былі адзначаны школьнікі, якія актыўна працавалі ў сельгаспрадпрыемстве “Дунілавічы-агра”. Сувеніры ім уручыў дырэктар гаспадаркі Павел Баляслававіч Будзіч.

Пасля завяршэння лінейкі дзеці разышліся па кабінетах — іх чакаў першы ў новым навучальным годзе ўрок “Як ты сэрцу майму міла, дарагая Беларусь!”.

Іна СНЯЖКОВА.

Фота аўтара.