Четверть столетия на комбайне

Сёлетняе жніво для Сяргея Францавіча Каралёнка асаблівае. 25 гадоў назад ён упершыню сеў за штурвал камбайна і з таго з часу не пакідае капітанскі мосцік. Апошнія адзінаццаць сезонаў разам з сынам працуе на “Мезе-204”. Для гаспадаркі гэтыя гады выдаліся асабліва ўраджайнымі, а для камбайнераў і вадзіцеляў — плённымі ў рабоце. Асабіста  С. Ф. Каралёнак тры разы выходзіў прызёрам і адзін раз — пераможцам рэспубліканскага спаборніцтва на ўборцы зерневых і зернебабовых, адзначаўся на “Дажынках”.

Пра свой шматгадовы поспех адзін з найвопытнейшых камбайнераў Пастаўшчыны гаварыў сціпла. Маўляў, калі выехаў у поле, то працаваць трэба з душой. Асабліва радуе спелая, умалотная збажына. На вялікі жаль, год на год не прыходзіцца. Вось і сёлета, хоць ураджайнасць у сельгаспрадпрыемстве і складае ў сярэднім 30 цэнтнераў з гектара, чакалі большай аддачы ад зямлі.

Сяргею Францавічу пашанцавала ў тым, што ў яго пастаянны памочнік, якому можна давяраць, як сабе. Сын Андрэй не горш за бацьку ведае ўборачную машыну, можа падмяніць у любую хвіліну. Пачынаў школьнікам, цяпер з’яўляецца студэнтам пятага курса Беларускай сельскагаспадарчай акадэміі. Марыць працягваць вучобу далей. А гэта значыць, што жніўным часам Андрэй зможа дапамагаць бацьку і ў наступным годзе.

Тэкст і фота Пятра КУРЫЛОВІЧА.